شوانیش وه‌ك هه‌موو هونه‌رمه‌ند و هۆزانڤانێكی كورد، جێگاو ڕێزێكی تایبه‌تی خۆی له‌ دڵی نه‌ته‌وه‌كه‌یدا كردووه‌ته‌وه‌. ئه‌وه‌ی كه‌ ئه‌م هونه‌رمه‌نده‌ ناوداره‌ چه‌نده‌ ماڵوێرانی و ده‌ربه‌ده‌ری دیوه‌ و نزیك نیو سه‌ده‌یه‌ قوڕگی خۆی بۆ هاندان و گه‌رم و گوڕ ڕاگرتنی شۆڕشی نه‌ته‌وایه‌تی ده‌دڕێنێ هه‌موو له‌ جێگای خۆی.

به‌ڵام له‌ ماوه‌ی ئه‌م 10ـ 15 ساڵه‌ی دواییدا كه‌ من له‌ جێژن و رێوڕه‌سمه‌كان دا بینیومه‌ و له‌ نزیكه‌وه‌ له‌گه‌ڵی ئاشان بووم و به‌ هۆی وتووێژی ڕادیۆ و یادی كۆماری كوردستانه‌وه‌ ده‌یبینم هێنده‌ی دیكه‌ له‌ دڵی مندا جێگای بووه‌ته‌وه‌ و قه‌در و حورمه‌تی له‌وپه‌ڕی خۆی دایه‌.
له‌ دووی ڕێبه‌ندان (ساڵڕۆژی كۆماری كوردستان)ی چه‌ند ساڵ پێشدا كه‌ ئه‌و كات ته‌نیا 16 سی دی ئاماده‌ كرابوو، من بینیم و پشتی هه‌موو سی دیه‌كانی بۆ ئیمڕا كردم و ئیتر له‌و كاته‌وه‌ جاروبار هه‌م له‌ ماڵ و هه‌میش له‌ رادیۆ گوێیان لێ ده‌گرم و وه‌ك یادگارێكی هه‌ره‌ شیرین و مه‌زن لای خۆم ڕامگرتوون. كاتێكیش بۆ ساڵیادی شه‌هید بوونی 10 ساڵه‌ی نه‌مر كاك دوكتۆر قاسملوو به‌شدار بوو، به‌ یادی ئه‌وه‌وه‌ "غه‌زل غه‌زاڵ"ی چڕی، وتی:" ئه‌و كاتانه‌ی دوكتۆر قاسملووم ده‌بینی ده‌یوت، شوان "غه‌زاڵ غه‌زاڵ"ێك بێژه‌." (دیاره ئێمساڵیش دیسان غه‌زاڵی وته‌وه)
بێجگه‌ له‌م كاتانه‌ش بۆ تووێژی رادیۆ ده‌نگی كوردستان چه‌ند جارێك ته‌له‌فوونم بۆ كردووه‌، دیاره‌ به‌داخه‌وه‌ ته‌نیا جارێكیان ده‌نگه‌كه‌مان له‌ رادیۆ بڵاو بووه‌وه‌! به‌ حوكمی ئه‌وه‌ی كه‌ ئه‌و جارانه‌ یه‌كترمان بینیوه‌ و جاروباره‌ش له‌گه‌ڵ به‌ڕێوه‌به‌رانی جێژنی دووی ڕێبه‌ندان ده‌بم، ده‌میناسیه‌وه‌.

له‌ بابه‌تی پێشوودا باسم كردووه‌ كه‌ سه‌ردانێكی ژووره‌كه‌ی شوان په‌روه‌ریشم كردووه‌. كه‌ چوومه‌ ژووره‌وه‌ ته‌نیا 4 كه‌س بووین، پاش به‌خێر هاتن و ئه‌حواڵپرسی یه‌كی كوردانه‌، سازه‌كه‌ی كۆك ده‌كرد و بۆ خۆ ئاماده‌ كردن گۆرانیه‌كانی به‌ نزمیی زه‌مزه‌مه‌ ده‌ركرد و مینش كه‌ له‌ هه‌ل ده‌گه‌ڕام تاكوو له‌ ده‌رفه‌تدا چه‌ند وێنه‌ی سروشتی لێ بگرم، جاروباره‌ په‌نجه‌م به‌ دیگتال كامراكه‌مدا دێنا و ئه‌وێش چووبووه‌ نێو عاله‌می خۆی.
له‌وانه‌ی كه‌ له‌ دیوه‌كه‌دا بوون ته‌نیا یه‌كیانم نه‌ده‌ناسی، ده‌نا بێجگه‌ له‌ شوان په‌روه‌ر و من، كاك ... به‌ڕێوبه‌ری رادیۆ ئاشتی (ئه‌ویش له‌ هه‌مان ستۆدیۆی "ڕادیۆ سێد ڤه‌ست"دا كه‌ رادیۆ ده‌نگی كوردستان له‌ لایه‌ن من و هاوڕێیانم به‌ڕێوه‌ی ده‌چێ، به‌رنامه‌كانی خۆی بڵاو ده‌كاته‌وه‌)، كه‌سێكی دیكه‌ش له‌وێ بوو. من پێم وابوو ئه‌م كابرایه‌ له‌گه‌ڵ شوان دا هاتووه‌ و ڕه‌نگه‌ ئاڵه‌تێكی موزیكی بۆ لێ بدا.
من ڕووبه‌ڕووی شوان دانیشتبووم و وێنه‌م ده‌گرت، كابراش كامێرایه‌كی زۆر باش و پێشكه‌وتووی به‌ من دا و داوای كرد كه‌ چه‌ند وێنه‌ی بگرم. كاتێك من وێنه‌كانم ده‌گرت كابرا زۆر له‌ شوان نزیك ده‌بووه‌وه‌ و به‌ قه‌وڵی فارسان ده‌یهه‌ویست وێنه‌كان تۆزێك خودمانی ده‌رچن. پاش گرتنی چه‌ند وێنه‌، ئینجا كامیراكه‌ی له‌ سه‌ر ڤیدیۆ دانا و به‌ منی وت فیلمی بگرم. ئه‌وه شوانیش چووه‌ته‌ نێو دونیای خۆیدا و چاوی نووقاندووه‌ و گۆڕانی ده‌ڵێ، له‌ ناكاو كه‌ ڤیدیۆكامیراكه‌ی بینی، قه‌ڵس بوو به‌ڵام چ قه‌ڵسبوونێك. ئالێره‌دا من دوو قه‌رانیه‌كه‌م داكه‌وت و زانیم كه‌ شوان له‌ بنه‌ڕه‌تدا ئه‌م كابرایه‌ ناناسێ و نازانێ كێشه‌.
شوان رووی له‌ كاك ... كرد و زۆر به‌ تووڕه‌یی وتی كاكه‌ مه‌گه‌ر تۆ نازانی من چه‌نده‌ نه‌فره‌تم له‌ ڤیدۆ كامیرا هه‌یه‌، وێنه‌ قه‌یدی ناكا به‌ڵام من ڕه‌قی دونیام له‌ ڤیدیۆ كامێرایه‌. ده‌بێ بڕۆن هه‌رچێ ڤیدیۆكامیرایه لایبه‌ن! ئه‌مه‌ چیه‌ له‌گه‌ڵ خۆت هێناوته‌...
ئۆی برا نه‌ڕۆ، ئالێره‌دا كاك ... هه‌ر ده‌پاڕاوه‌ و مامۆستا گیان، مامۆستا گیان داوای لێبوردنی له‌ شوان ده‌كرد و هه‌ر ده‌یوت:"مامۆستا گیان له‌ قوسورا مه نه‌مێزه‌". ئه‌وه‌ منیش ویژدانه‌ن ناڕه‌حه‌تم و نه‌مده‌توانی هیچیش بێژم، یان راسته‌كه‌تان ده‌وێ نه‌مده‌وێرا هیچ بڵێم، چوونكه‌ زۆرم خۆش ده‌وێ، ده‌ترسام له‌ منیش تووڕه‌ بێ. بۆیه بێده‌نگیم به باشتر زانی.
راسته‌كه‌تان ده‌وێ، ئیتر من له‌ خه‌جاڵه‌تیدا نه‌متوانی ئه‌مساڵ وتووێژی له‌گه‌ڵ بكه‌م. ئه‌گه‌ر مه‌رگ مۆڵه‌تی داین ئه‌وا هه‌ڵیده‌گرین بۆ جارێكی دیكه‌.
جا وه‌سیه‌ت بێ، له‌ شوێنی وادا هه‌تا كابرا نه‌ناسن و باش نه‌زانن كێیه‌، له‌ خۆڕا وێنه‌ی كه‌س نه‌گرن.