خوێنه‌ری هێژا به‌م زووانه‌ نه‌ورۆزه‌ و ساڵێكی نوێ ده‌ست پێده‌كا، زۆر به‌جێ یه‌ بۆ كوردان كه‌ بزانن زیاتر له‌ نیو سه‌ده‌ له‌مه‌وبه‌ر، كاتێك كوردی كوردستان بۆ ماوه‌ی كه‌متر له‌ ساڵێك سه‌ربه‌خۆیی خۆی له‌ به‌شێكی چووكه‌ی خاكی باب و باپیرانماندا به‌ده‌ست هێنا، چۆن یادی ئه‌م ڕۆژه‌ مێژوویه‌ی له‌ كه‌ش و هه‌وایه‌كی ئازاد دا كردوه‌ته‌وه‌. بۆ ئه‌م مه‌به‌سته‌ش من وتارێكم له‌ رۆژنامه‌ كوردستان ژماره‌ 27، ئورگانی كومیته‌ ناوه‌ندی حیزبی دیموكرات له‌ كۆماری كوردستان له‌ مه‌هاباد وه‌رگرتووه‌ و بۆ ئه‌وه‌ی باشتر بخوێندرێته‌وه‌ جارێكیتر تایپم كردووه‌ته‌وه‌ كه‌ هیوادارم ئه‌مانه‌تم پاراستبێ.
جێژنی نه‌ورۆز له‌ هه‌موو لایه‌ك پیرۆز بێ.
حامید درودی
14/3/2004

رۆژی پێنج شه‌ممۆ هه‌وه‌ڵی ساڵی 1325 كاتێك هه‌تاو له‌ پشتی كێوه‌ جوانه‌كانی كوردستان، گه‌ردنی به‌رز كرده‌وه‌ و به‌ تیشكی تنداری خۆی مزگێنی به‌هاری ته‌ڕ و تازه‌ و رۆشتنی سه‌رما و سه‌هۆڵی زستانی به‌ ئافه‌ریده‌كانی خوای بێ هاوتا ده‌دا. مه‌هابادیش له‌گه‌ڵ میوانه‌ ئازیزه‌كانی بارزانی و دانیشتوه‌كانی خۆی ورد و دروشت كیژ و لاو به‌ دڵێكی هێزدار و روویه‌كی گه‌شه‌وه‌ بۆ نیشاندانی به‌روبووی به‌هاری كوردان كه‌ چه‌ندێك له‌مه‌وپێش باخه‌وانێكی به‌ راوێژ ره‌نێوی هێناوه‌، وا ئاماده‌ بوون و رازابوونه‌وه‌ كه‌ دۆست له‌ دیتنیان له‌ پێستی خۆیدا نه‌ده‌گونجا و له‌به‌ر كه‌یف خۆشی نه‌دحه‌جمان. چوونكوو زۆر له‌ مێژ بوو گه‌لی كورد نه‌ورۆزی له‌به‌ر زوڵم و زۆری بله‌وه‌زه‌كان له‌بیر كردبوو و رۆژی واشی به‌خۆیه‌وه‌ نه‌دیبوو.
داخی گرانم كه‌ زمانم لاڵ و قه‌ڵه‌مم كوله‌ وه‌ك پێویسته‌ بتوانم باس و تاریفی نه‌ورۆزی ئه‌وساڵ بكه‌م كه‌ به‌ سلآمه‌تی و پیرۆزبایی پێشه‌وای مه‌زنی كوردستان و سه‌ربه‌ستی كوردان له‌ شاری مه‌هاباد گیراوه‌ بنووسم، به‌لآم دیسان گوتن و نووسینی له‌ شاردنه‌وه‌ چاك تره‌.
سه‌عات 8ی به‌یانی رۆژی ناوبراوی سه‌ره‌وه‌ كاتێك له‌ دوو شه‌قامی قازی و وه‌فایی له‌به‌ر كۆمه‌ڵ ره‌ش ده‌چوو و پێشمه‌رگه‌كانی شاریش به‌ تێكه‌ڵ بوونی پیاوان كیژ و لاو به‌ ره‌نگێكی سوور و سپی و سه‌وز ده‌دره‌وشانه‌وه‌، له‌ ناكاو ئاوازی فریشته‌كانی ئازادی و رۆڵه‌ خوێنگه‌رمه‌كانی ره‌شیدی كورد له‌ ناو كۆمه‌ڵ و ده‌شت و چیای شاردا وا ده‌نگی دایه‌وه‌، كه‌ ئه‌گه‌ر بڵێم مردووه‌كانی قه‌برستانی مه‌لا جامی له‌ خۆشی و سروری ئه‌و رۆژه‌ وه‌خه‌به‌ر هاتبوون و رۆحی پاكیان وا له‌سه‌ر سه‌ری ئه‌و لاوانه‌وه‌ ده‌گه‌ڕان، به‌ خودا ئغراقم نه‌گوتووه‌. چوونكوو قوتابیه‌كانی مه‌دره‌سه‌ی كچان و كوڕانی ئپدایی و سانه‌وی له‌ دوای پۆلێك له‌ كوڕان كه‌ لیباسی سوور و سپی و سه‌وزیان به‌ ره‌نگی ئالآ له‌به‌ر كردبوو، ئه‌وانیش به‌ ئالآی سێ ره‌نگی كوردستان و شه‌عاری میللی رازابوونه‌وه‌ و له‌ ژێر ئحساساتی میللی و چه‌پڵه‌ڕێزانی خه‌ڵك و وته‌ی بژی پێشه‌وای به‌رزی كوردستان بژی ئازادی و سه‌ربه‌خۆیی و مه‌حوو و نابوودی ئیستعمار و به‌له‌وه‌زی، به‌ زه‌بر و زه‌نگ شه‌قامی وه‌فاییان ته‌ی كرد و هاتنه‌ چوار رای قازی راوه‌ستان.
ئه‌هلی شار مه‌ست و خه‌ماری ئه‌و شادمانی یه‌ بوون كه‌ مه‌نزه‌ره‌یه‌كی به‌رز و جوانتری پێدابوو، یانێ فه‌داییان و سه‌ربازه‌كانی به‌هێزی هێزی كوردستان و بارزان كه‌ به‌ته‌واوی ئه‌سڵه‌حه‌ و مهماتی جه‌نگی، به‌ تفه‌نگ و مسلسل و تۆپ ئاماده‌ كرابوون له‌ لای سه‌ربازخانه‌وه‌ به‌ راهنمایی تاقمێكی موزیك و سه‌رپه‌رسته‌كانیان شه‌قامی قازییان دوای هێناو هاتنه‌ چوارڕێ و له‌ جێگای خۆیان به‌ سه‌ف راوه‌ستان.
قوتابیه‌كان له‌ دیتنی هێزی به‌ڕێو وشوێنی كوردستان و هێزیش به‌ دیتنی چه‌ند هه‌زار قوتابی كه‌ به‌ لیباسی یه‌ك ڕه‌نگ و رۆحی یه‌كیه‌تی سه‌فیان به‌ستبوو، شاد و خه‌ندان بوون.
به‌لآم خه‌ڵكی شار له‌ دیتنی ئه‌و دوو مه‌نزه‌ره‌یه‌ سه‌ریان سووڕ ما، چونكوو ئه‌و پێشكه‌وتنه‌ به‌رزه‌ له‌ ماوه‌ی 2 مانگی حكومه‌تی كوردستان دا به‌ رێبه‌ری پێشه‌وای عه‌زیزمان جه‌نابی قازی محه‌ممه‌د به‌ده‌ست هێناوه‌، كه‌ ئه‌ویش له‌ بیر و عه‌قڵی هه‌موو كه‌س دوور بوو.
له‌و كاته‌دا كه‌ قوتابی و سه‌ربازه‌كانی و خه‌ڵكی شار مه‌ستی ته‌بعی ئازادی و جێژنی نه‌ورۆز و هاتنی فه‌سڵی به‌هار بوون، فه‌رمانی خه‌به‌ردار و ده‌نگی سلآمی ره‌سمی موزیك كه‌ ته‌شریف هێنانی سه‌رداری مه‌حبووب و پێشه‌وای مه‌زنی ئیعلام ده‌كرد، وه‌خه‌به‌ر هاتن.
زاتی موعه‌ده‌س له‌ پاش گرێدانی گوزارشات كه‌ به‌ وه‌سیله‌ی فه‌رمانده‌ی هێز درا، داخلی ناوی كۆمه‌ڵی مه‌دره‌سه‌ییه‌كان بوو. ئه‌وه‌ڵ به‌ كچه‌كان و كوڕه‌كانی فه‌رم: "شاد بن كچانم، شاد بن كوڕانم." خه‌ڵك به‌ گوێ لێبوونی ئه‌و دوو وته‌یه‌، له‌به‌ر شادی فرمێسكیان ده‌ڕژاند. هه‌ر به‌و جۆره‌ش بازدید و شادباشی له‌ پێشمه‌رگه‌كانی هێزی كوردستان و بارزان فه‌رموو و دوایه‌ هاته‌ پشتی تریبوون و راوه‌ستا و نوتقێكی به‌تینی ئیراد فه‌رموو. پاش پێ پیرۆزه‌ و رۆژباشی رۆژی تاریخی نه‌ته‌وه‌یی كورد فه‌رمووی: " ئه‌م رۆژانه‌ تورك و ئێران و عێراق خه‌ریكی گوفتوگۆن و دیانه‌وه‌ێ په‌یمانی مه‌نحوسی سه‌عدئاباد كه‌ ماده‌یه‌ك به‌ زیانی كوردانه‌، ئێستاش هه‌ر بۆ دوژمنایه‌تی كوردان تازه‌ی بكه‌نه‌وه‌ و بزانن ئه‌و مادانه‌ وه‌كوو له‌ پێشدا كاغه‌زپاره‌یه‌ك پتر نه‌بوون، ئێستاش كاغه‌زپاره‌یه‌ك زیاتر نییه‌"، و له‌ نێو بیاناتی خۆیدا فه‌رمووی: "ره‌زاشا، موسته‌فا كه‌ماڵ و مه‌له‌ك فه‌یسه‌ڵ كه‌ بۆ دوژمنایه‌تی كوردانیان په‌یمانیان به‌ست، له‌ ماوه‌یه‌كی كه‌مدا خوا له‌ نێوی بردن، ئێستاش ئومیدمان له‌ خوای به‌رز ئه‌وه‌یه‌ كه‌ ئه‌و كه‌سانه‌ی خه‌ریكی به‌ستنی په‌یمان به‌ دوژمنایه‌تی كوردانن، به‌ ده‌ستی خۆیان قه‌بری خۆیان هه‌ڵده‌كه‌نن." له‌ جه‌نابی مه‌لا موسته‌فای عه‌زیمی بارزان به‌خێرهاتن و سپاسی فه‌رموو و له‌ هێزی بارزان و ئه‌فسه‌رانی ئه‌رشه‌دی ئه‌و هێزه‌ زۆری قه‌دردانی كرد. پاشان جه‌نابی مامۆستا مه‌لا حه‌سه‌نی مه‌جدی نوتقێكی به‌تینی راجع به‌ ته‌عاون و كۆمه‌ك به‌یه‌كتری، به‌تایبه‌تی له‌ بابه‌ت كۆمه‌كی ئجتماعی و فه‌ردی له‌ باره‌ی پێشمه‌رگه‌كان و ئه‌فسه‌رانی غه‌یوری بارزان ئیراد فه‌رموو، كه‌ جۆش و خرۆشێكی زۆری له‌ نێو خه‌ڵكدا هه‌ڵستاند و چه‌ند كه‌س له‌ برایان نوتق و مه‌قاماتیان خوێنده‌وه‌.
هاشم خه‌لیل زاده‌.