ده‌زانن بیجگه‌ له‌ خزمایه‌تی زۆر فاكته‌ری دیكه‌ ده‌بنه‌ هۆی لیك نزیك بوونه‌وه‌ی خه‌ڵك له‌ یه‌كتر؟ یه‌كیك له‌و فاكته‌رانه‌، بیروباوه‌ڕه‌ كه‌ خه‌ڵكی كوردی لیك نزیك كردووه‌ته‌وه‌. ده‌سته‌خۆشكایه‌تی میم مه‌عسه‌ و دایكیشم وابوو. ئه‌مان بیجگه‌ له‌وه‌ی خزم بوون، كوڕی هه‌ردووكیان پیشمه‌رگه‌ی حدكا و له‌ یه‌ك هیزیشدا بوون، به‌داخه‌وه‌ كوڕه‌كه‌ی ئه‌و كاتێك پێشمه‌رگه‌كان له‌ "ته‌نگی خاو"دا كه‌وتنه‌ گه‌مارۆی جاش و پاسدار و گیانی فیدای میلله‌ته‌كه‌ی كرد و چووه‌ ڕیزی كاروانی شه‌هیدان.
من بۆ خۆم باوه‌ڕم به‌ هه‌ڵاواردنی ژن و پیاو نیه‌ و وه‌ك یه‌ك چاویان لی ده‌كه‌م، به‌ڵام له‌ كۆمه‌ڵگا دواكه‌وتووه‌كه‌ی ئیمه‌دا كه‌ كوڕ سه‌رچاوه‌ی داهاتی بنه‌ماڵه‌یه‌، هه‌بوونی كوڕ بۆ دایكان ڕه‌نگه‌ تۆزیك باری ژیان سووك بكا. (هه‌رچه‌ند من هه‌ر زه‌حمه‌ت و عه‌زیه‌ت بووم بۆ دایكم). ئه‌مه‌م بۆیه‌ باس كرد كه‌ بزانن میم مه‌عسه‌ بێجگه‌ له‌ شه‌هید كاك عوسمان، كوڕێكی دیكه‌ی هه‌بوو ئه‌ویش له لێكدانی ماشێندا گیان له‌ ده‌ست ‌دا و ‌ هێنده‌ی دیكه‌ جگه‌رسووتاو ده‌مینیته‌وه‌ و ده‌بێته‌ هاوده‌ردی دایكم كه‌ دوو كوڕی پێشمه‌رگه‌ بووه‌ (یه‌كیان بریندار)، هێنده‌ی دیكه‌ هاوده‌رد و یه‌ك له‌ یه‌ك زیاتر جگه‌رسووتاوتر، زۆر خۆشیان له‌ هاوڕێیه‌تی یه‌كتر هاتووه‌ و زۆر جار پێكه‌وه‌ هاتووچۆ و سه‌فه‌ریان كردووه‌، به‌تایبه‌تی ئه‌م چه‌ند ساڵه‌ی دوایی.
ده‌زانم كه‌ میم مه‌عسه‌ به‌ له‌ده‌ست دانی دایكم زۆر خه‌فه‌تبار بووه‌ و گوایه‌ ئۆقره‌ی له‌به‌ر بڕاوه‌ و بێ هاوده‌م ماوه‌ته‌وه، به‌ تایبه‌تی له‌ ڕۆژی كۆچی دوایی دایكمه‌وه‌ یه‌كجار ناڕه‌حه‌ته‌. دیاره‌ دێی میم مه‌عسه‌ له‌ دێی ئیمه‌وه‌ ته‌نیا مه‌ودای چه‌ند كیلومیتره‌ و زۆر به‌ هاسانی توانیویه‌ بێ بۆ لای دایكم یان دایكم بڕوا بۆ لای ئه‌و. ڕۆژانی پرسه‌ و سه‌ره‌خۆشیش میم مه‌عسه‌ په‌یتا په‌یتا هاتووچۆی نێوان ئه‌م دوو دێیه‌ی كردووه‌ و گریاوه.
ئێستا به‌ڕاستی من خه‌فه‌ستی میم مه‌عسه‌ خه‌م و په‌ژاره‌ی له‌ده‌ستدانی دایكمی له‌بیر بردوومه‌ته‌وه‌. منیش ده‌زانم له‌ ده‌ست دانی هاوڕێ و خزمێكی گیانی به‌ گیانی سه‌خت و گرانه‌، به‌ڵام ئه‌مه‌ ڕه‌وتی سرووشته‌ و ده‌بێ بیپێوین. ده‌سه‌ڵات نیه‌.
دڵنیاشم كه‌ كه‌سانێك له‌ لای خۆمانه‌وه‌ چاو له‌م بلاگه‌ی من ده‌كه‌ن و میم مه‌عسوومه‌ش له "كاوانه"‌ ده‌بینن، جا ده‌توانن زه‌حمه‌ت بكێشن پێی بڵێن كه‌:
. هێنده‌ خه‌فه‌ت نه‌خوا ئه‌م دینایه‌ ئه‌وه‌ی ناهێنی.
هه‌ر وه‌ك جاران چۆن له‌گه‌ڵ دایكم دا ده‌گه‌ڕای و گه‌ڕانت پێ خۆش بوو و ئه‌م شار و ئه‌و شارتان ده‌كرد و له‌و دێهاتانه‌ی لای خۆماندا ده‌چوون بۆ سه‌ردانی خزمان، ئێستاش هه‌ر به‌رده‌وام به‌ و بگه‌ڕێ، چوونكه‌ له‌م ته‌مه‌نه‌دا تۆ پێویستت به‌ گه‌ڕانه. ده‌نا ئه‌گه‌ر هه‌ر له‌ ماڵدا دانیشێ و خه‌فه‌ت بخۆی، ئه‌وا هێنده‌ ناخایه‌نێ كه تیداده‌چی.
جارو باره‌ش بڕۆ بۆ ئه‌لای ماڵان و سه‌رێك له‌ گۆڕی هاوڕێكه‌ت بده‌ و هه‌روه‌ك جاران دوو قسه‌ی له‌گه‌ل بگۆڕه‌وه‌، با خه‌م و خه‌فه‌ت له‌ دڵتدا نه‌مێنێته‌وه‌. جارو باره‌ش سڵاوێكی ئێمه‌ی پێ بگه‌یه‌نه‌.
ۆ خۆشت باش ده‌زانی كه‌ شه‌هید عوسمان دیاره‌ كوڕی تۆ بوو، به‌ڵام ئێستا كوڕی هه‌موو كوردێكی باشه‌ره‌ف و نه‌ته‌وه‌پارێزه‌، شه‌هید تاجی سه‌ربه‌رزی میلله‌ته‌، تازه‌ بێجگه‌ له‌مه‌ش كوڕی تۆ ناوی له‌ لیسته‌ی شه‌هیدانی گه‌لی كورددا تۆمار كراوه‌ و جیگای تایبه‌تی خۆی له‌ دڵی گه‌له‌كه‌یدا هه‌یه‌. شاعیر ده‌ڵێ:" ئه‌و رێگایه‌ی من بۆ كوژرام له‌ نێو گۆڕیشدا دڵنیام/ كه‌ ئێوه‌ لاوانی كورد ده‌ستێنن خوێن و هیوام.
ئیتر له‌ كۆتاییدا هیوای ته‌مه‌ن درێژیت بۆ ده‌خوازم و هه‌روه‌ها هیوادارم بمێنی تاكوو من ده‌گه‌ڕێمه‌وه‌، ئه‌وجار پێكه‌وه‌ ده‌ڕۆین بۆ سه‌ر گۆڕی شه‌هید عوسمان. ئاگاشم لێیه‌ كه‌ تازه‌ ده‌ستكاری گڵكۆكه‌ت كردووه‌ و به‌ سیمان و به‌رد بۆت ڕازاندووه‌ته‌وه‌. ده‌بێ ئه‌وه‌ش بزانی كه‌ سه‌دان كه‌سی وا له‌ بنارو سه‌ر كێوه‌كانی كوردستانه‌دا‌ نێژراون كه‌ وه‌ك "سه‌ربازی ون"یان لێهاتووه‌.ئه‌مانه‌ هه‌موو له‌ جیگای خۆی، ده‌بێ ئه‌وه‌ش بزانی كه كوڕێكت شه‌هید بووه‌، به‌ڵام هه‌زاران كوڕی دیكه‌ت ئه‌و ڕێبازه‌یان گرتووه‌ته‌ به‌ر و سه‌ركه‌وتن هه‌ر هی گه‌له‌ و سه‌رشۆڕ و نه‌مانیش بۆ جاش و خایینانی گه‌ل ده‌مێنێته‌وه‌.
هه‌ر بژیت له‌ شادی دا.