ئێستاش كه‌ ئێستایه‌، ده‌نگه‌ زوڵاڵ و به‌ هه‌یبه‌ته‌‌كه‌ی له‌ گوێمدا ده‌زرینگێته‌‌وه‌، كاتێك له‌ كاناڵی ٢ی ته‌‌له‌فزیۆنی سویددا هه‌واڵی پێشمه‌رگه‌كانی حیزبی دیمۆكراتی ده‌خوێنده‌وه‌ و له‌ سه‌ر رپوتاژێك "شه‌ڕه‌ له‌بیر كراوه‌كه‌" روونكردنه‌وی ده‌دا كه‌ چۆن پێشمه‌رگه‌كان ژیان به‌سه‌ر ده‌به‌ن و چۆن چالاكیه‌ نیزامیه‌كانی خۆیان به‌ڕێوه‌ ده‌به‌ن. ئه‌م مێژووه‌ش ده‌گه‌ڕێته‌‌وه‌ بۆ زیاتر له‌ ١٢ ساڵ له‌مه‌وبه‌ر، ئه‌و كاته‌ "به‌نگت‌" یه‌كێك له‌ ناسراوترین هه‌واڵده‌ره‌كانی ته‌‌له‌فزیۆنی سوید بوو. پاش ئه‌و رپۆرتاژه‌ كه‌ له‌سه‌ر پێشمه‌رگه‌كانی حیزبی دیمۆكرات‌ بڵاوی كرده‌وه‌ هه‌میشه‌ تامه‌زرۆی ئه‌وه‌ بووم كه‌ له‌ نزیكه‌وه‌ ئه‌م كابرایه‌ ببینم و له‌سه‌ر بیروڕای به‌ نسبته‌‌ مه‌سه‌له‌ی كورده‌وه‌ هێندێك پرسیاری ئاراسته‌‌ بكه‌م. ڕۆژگار هاتووچوو، تاكوو به‌ شێوه‌یه‌ك زۆر چاوه‌ڕوان نه‌كراو له‌گه‌ڵی بووم به‌ ئاشنا و جاروباره‌ ده‌مبینی، به‌ڵام به‌داخه‌وه‌ ئه‌م ئاشنا بوونه‌ هێنده‌ی نه‌خایاند كه‌ "به‌نگت‌" خانه‌نشین كرا و ماوه‌یه‌كی كورت‌ دوای خانه‌نشین كردنیش تووشی نه‌خۆشی فه‌رامۆشی بوو و من ئیتر نه‌مدیته‌‌وه‌، به‌ڵام به‌ هۆی كچه‌كه‌یه‌وه‌ همیشه‌ ئاگاداری وه‌زعی ده‌بووم.
دیاره‌ پێش ئه‌وه‌ی تووشی نه‌خۆشی فه‌رامۆشی ببێ، حه‌زێكی یه‌كجار زۆری له‌ ماسی گرتن بوو و هه‌ر بۆیه‌ش كه‌م جار ده‌كه‌وته‌‌ ماڵ و زۆر جاریش بۆ ماسی گرتن ڕێگایه‌كی چه‌ند كیلومیتری ده‌بڕی. له‌به‌ر ئه‌م كرده‌وه‌ش بوو كه‌ له‌ نێو هێندێك خه‌ڵكدا به‌ "پیره‌ ماسیگره‌كه‌" ناسرابوو.
له‌به‌ر ئه‌وه‌ی كه‌ به‌نگت‌ ‌ منداڵێكی كه‌وه‌بووه‌ به‌ر ماشینی كابرایه‌كی مه‌ست‌، له‌گه‌ڵ چه‌ندین دایك و بابی دیكه‌ كۆمه‌ڵه‌ی (دژی شۆفیره‌ مه‌سته‌‌كان) پێك هێنا و بۆ خۆشی ماوه‌یه‌ك به‌رپرسایته‌‌ی ئه‌و كۆمه‌ڵه‌یه‌ی له‌ ئه‌ستۆ بوو.
له‌به‌ر ئه‌وه‌ی كه‌ "به‌نگت‌" له‌ ٦٠كانه‌وه‌ ڕۆژنامه‌نووس و رووناكبیر بوو، ئاگاداریه‌كی زۆر باشی له‌سه‌ر نه‌ته‌‌‌وه‌ی كورد هه‌بوو، ئه‌و كاته‌‌ش كه‌ رپۆرتاژی "شه‌ڕه‌ له‌بیر كراوه‌كه‌" بڵاو كرایه‌وه‌ بۆ خۆی به‌رپرسی هه‌وڵه‌كانی كاناڵی ٢ی ته‌‌له‌فزیۆنی سوید بوو.
"به‌نگت‌" مرۆڤێكی ناسراو بوو و له‌به‌ر ئه‌وه‌ی بۆ ماوه‌یه‌كی دوور و درێژ هه‌موو ئێواران هه‌واڵه‌كانی به‌ شێویه‌كی لێوه‌شاوه‌ و زۆر بێ هه‌ڵه‌ ده‌خوێنده‌وه‌، ته‌‌واوی دانشتوانی سوید ده‌یانناسی.
یاره‌ "به‌نگت‌" ماویه‌كی زۆر له‌ نه‌خۆشخانه‌دا ژیانی به‌سه‌ر ده‌برد و بێ ده‌نگ بوو، به‌ بڕوای من به‌ بێده‌نگ بوون و نه‌مانی "به‌نگت‌"، كورده‌كان دۆسه‌ێكی دیكه‌یان له‌ده‌سه‌ دا.
ڕۆژی شه‌ممه‌ی ڕابردوو، ئه‌م كابر ئه‌فسانه‌ییه‌ی ته‌‌له‌فزیۆنی سوید چاوی لێك ناو كۆچی دوایی كرد. به‌م جۆره‌ "به‌نگت‌ ئوسته‌‌" له‌ ماوه‌ی ژیانی ٧٧ ساڵی خۆیدا، له‌ بواری ڕۆژنامه‌گه‌ری و ڕاگه‌یاندندا تێكۆشانێكی زۆر به‌رچاوی هه‌بوو، له‌ چه‌ندین ڕۆژنامه‌ی ناسراوه‌ی سویددا كاری كردبوو كه‌ دواجار له‌ ته‌‌له‌فزیۆنی سویددا گرسابووه‌وه‌ و تاكوو ته‌‌مه‌نی خانه‌نیشین كردن له‌و شوێنه‌ كاری كرد و توانی ناوی خۆی له‌ مێژووی ده‌نگ و ره‌نگی سویددا بۆ هه‌تا هه‌تایه‌ ‌ تۆمار بكا.

یادی "به‌نگت‌ ئو‌سته‌‌" به‌ خێر بێ.