ماوه‌یه‌ك له‌ به‌ر كار و گرفتاری هیچم نه‌نووسیوه‌، كه‌س و كاریش گله‌یی ده‌كه‌ن، له‌به‌ر ئه‌وه‌ هاتمه‌ سه‌ر ئه‌و باوه‌ڕه‌ كه‌ شتێكی زۆر سه‌یر و سه‌مه‌ره‌تان بۆ باس بكه‌م، ڕه‌نگه‌ بۆ زۆر كه‌س سه‌یر و سه‌مه‌ره‌ نه‌بێ، چوونكه‌ هه‌ر كلتووره‌و هێندێك شتی تایبه‌ت به‌ خۆی هه‌یه‌ كه‌ بۆ نه‌ته‌وه‌ و كلتووره‌كانی دیكه‌ به‌ سه‌ریر دێته‌ به‌رچاو. ئه‌مه‌ی منیش ده‌مهه‌وێ باسی بكه‌م یه‌كێك له‌و شتانه‌یه‌ كه‌ تایبه‌ته‌ به‌ كلتووری سویده‌وه‌.

هه‌ر له‌ مێژه‌ كه‌ له‌ كلتووری سوێدیدا باوه‌ كه‌ كاتێك كچ و كوڕێك ده‌یانهه‌وێ ژیان هاوبه‌ش پێك بێنن، واته‌ ده‌بنه‌ ده‌سگیرانی یه‌كتری، ده‌سته‌ خۆشكی كچه‌كه‌ و هاوڕێیانی كوڕه‌كه‌ هه‌ركه‌سه‌ و به‌ جیا ئه‌و كچ و كوڕه‌ له‌گه‌ڵ خۆیان ده‌به‌ن و پێیان ڕاده‌بوێرن. ده‌سته‌ خۆشكی كچه‌كه‌ جلوبه‌رگی سه‌ریو سه‌مه‌ره‌ ده‌كه‌نه‌ به‌ریان و كچه‌ له‌ نێو داشقه‌یه‌كدا داده‌نێن و سه‌روڕوومه‌تی ڕه‌نگ ده‌كه‌ن و به‌ شوێن خۆێاندا ده‌یكێشن، هه‌ركه‌سێك هاته‌ به‌رڕێیان رایده‌گرن و كچه‌ی پێ به‌ ماچ ده‌ده‌ن و دراو (پوڵێك)ی لێ ده‌ستێنن، دوای ئه‌وه‌ی ماندوو بوون پووڵ و پاره‌كه‌ ده‌ده‌ن به‌ ئاوجۆ (بیره‌) و ده‌ست ده‌كه‌ن به‌ خواردنه‌وه‌. له‌ بیرمه‌ تازه‌ له‌ كوردستان گه‌ڕابوومه‌وه‌ و له‌گه‌ڵ ژنه‌ كورده‌كه‌م له‌ پاركی شاره‌كه‌ماندا دانیشتبووین، ده‌سته‌یه‌كی كچی تازه‌ پێگه‌یشتوو و قه‌یره‌ هاتن و كچێكی ناسكۆڵه‌ی قژ زه‌ردی چاوشینی باڵانمامیشیان له‌ نێو داشقه‌یه‌كدا دانابوو، ده‌مووچاویان ڕه‌نگ كردبوو، ده‌وروبه‌ری داقه‌شقه‌كه‌یان به‌ پوودان و "كاندم"ی هه‌ڵمساوی پڕ له‌ با ڕازاندبووه‌وه‌ و به‌دوای خۆیاندا ده‌یانكێشا، كچه‌كانیش جلكی سه‌یر و سه‌مه‌ره‌یان له‌ به‌ر كردبوو، هێندێكیشیان فیقنه‌ و زوڕنایان به‌ده‌سته‌وه‌ بوو و بێ پسانه‌وه‌ فوویان پیا ده‌كرد، كه‌ منیان بینی راست هاتن و له‌ به‌رده‌م ئێمه‌دا ڕاوه‌ستان، یه‌كێك له‌و كچانه‌ كۆنه‌ ژنی من بوو كه‌ پێش ئه‌وه‌ی بڕۆمه‌وه‌ بۆ كوردستان لێك جیا بوو بووینه‌وه‌. به‌ منیان وت ده‌بێ بووك (وه‌وی)یه‌كه‌ ماچ بكه‌ی، منیش داوی تاوێك حه‌په‌سان لێوم له‌ سه‌ر گۆناك كچه‌ داناو ماچێك له‌م لاو ماچێكیش له‌و لام به‌ نسیبی خۆم كرد. ئه‌وانیش داوای دروایان كرد، منیش 100 كرۆنم پێدان. زۆریان پێ خۆش بوو، له‌به‌ر ئه‌وه‌ ئه‌وانی دیكه‌ كه‌ ماچیان كردبوو، 1 كرۆن و 5 كرۆن و شتی وایان دابوونێ. ڕۆیشتن وتیان ده‌چین بیره‌ ده‌خۆینه‌وه‌...
كوڕه‌كان تۆزێك تووندوتیژتر له‌گه‌ڵ هاوڕێ تازه‌ به‌ ده‌ستگیران بووه‌كه‌یان ده‌جوڵێنه‌وه‌، جاری وایه‌ زۆر زۆر سه‌رخۆشی ده‌كه‌ن و هه‌رچی په‌ت په‌تی یه‌ به‌سه‌ر دێنن، ده‌یبه‌ن بۆ دانس و دیسكۆ، بۆ شوێنه‌ گشتیه‌كان و به‌ كورت و كرمانجی ئه‌و شه‌وه‌ ده‌یكه‌نه‌ گاڵته‌جاڕی خۆیان. جاری وا بووه‌ كابرایان به‌ مه‌ستی له‌ نێو شه‌مه‌ندوفه‌ردا داناوه‌ و بلیتی شارێكی دیكه‌یان بۆ كڕیوه‌ كه‌ چه‌ندین كاتژمێر له‌ شاره‌كه‌ی خۆیه‌وه‌ دوور بووه‌ و به‌ڕێیان كردووه‌. یان هاتوون كابرایان به‌ چاو به‌ستراوی بردووه‌ بۆ شوێنێک كه‌ بۆ خۆی به‌ خه‌ونیش نه‌یدیووه‌.
جا ئه‌م گاڵه‌ كردنه‌ كه‌ زۆرتر باری هاوڕێیه‌تی و دۆستایه‌تی و خۆشه‌ویستی به‌رامبه‌ر به‌و كه‌سانه‌ پیشان ده‌دا، بۆ كچه‌كه‌ پێی ده‌ڵێن "مۆهیپا" و بۆ كوڕه‌كه‌ش پێی ده‌ڵێن "سڤه‌ن سكسا".