له‌ هێرشێكی تووندێ سه‌ربازیدا، كه‌ بۆ هه‌مووان بێجگه‌ له‌ ڕێبه‌رانی كۆماری ئیسلامی ئێران و ده‌وروبه‌ره‌ نێزامی و ئایینیه‌كانی نه‌بێ ئاكامه‌كه‌ی روون و ئاشكرا بوو، مه‌رقه‌دی حه‌زره‌تی عه‌لی له‌ هێزه‌كانی مقتدا سه‌در وه‌رگیرایه‌وه‌ و سه‌دان كه‌س له‌ هێزه‌كانی له‌شكه‌ری مه‌هدیش گیران. به‌ جێگیر بوونی هێزه‌ سه‌ربازیه‌كانی عێراق له‌ مه‌رقه‌دی حه‌زره‌تی عه‌لی و گیرانی هێزێكی زۆر له‌ له‌شكه‌ری مه‌هدی، ئێستا ئیتر گه‌ڕان به‌ دوای كه‌سانی هه‌ڵاتوو و چه‌كدار له‌و شاره‌دا ده‌ستی پێكردووه‌. له‌م نێوه‌دا بڵاو بووه‌ته‌وه‌ كه‌ گوایه‌ "مقتدا سه‌در" كه‌ فه‌رمانی جیهادی دابوو، خۆی هه‌ڵاتووه‌ته‌ ئێران. له‌ هه‌واڵێكی دیكه‌دا هاتووه‌ كه‌ ناوبراو له‌ ماوه‌یه‌ك له‌مه‌وبه‌ره‌وه‌ له‌ ده‌وروبه‌ری شاری "مهران" كه‌ له‌ ڕۆژئاوای ئێراندا هه‌ڵكه‌وتووه‌ گیرساوه‌ته‌وه‌ و له‌وێوه‌ له‌گه‌ڵ هێندێك له‌ فه‌رمانده‌ره‌كانی سپای پاسدارانی ئێراندا رێبه‌ری شه‌ڕه‌كه‌ی مه‌رقه‌دی حه‌زره‌تی عه‌لی كردووه‌. تاكوو ئێستا نه‌ له‌ مه‌رقه‌دی حه‌زره‌تی عه‌لی و نه‌ له‌ شاری نه‌جه‌فدا هیچ شوێنێك له‌ مقتدا سه‌در نه‌بینراوه‌ته‌وه‌، ئه‌مه‌ش بۆ خۆی به‌ڵگه‌یه‌كه‌ بۆ ئه‌وه‌ی كه‌ مقتدا سه‌در له‌ چه‌ند ڕۆژ پێشه‌وه‌وه‌‌ شاری نه‌جه‌فی به‌جێ هێشتووه‌ و ئاگاداریه‌كانیشی له‌ نێو خۆی ئێرانه‌وه‌ له‌ چاپ دراون، هه‌ر بۆیه‌ش كاتێك گروپێك له‌ لایه‌ن حكومه‌تی كاتی عێراق له‌ به‌غداوه‌ چوون بۆ دیداری، نه‌یانتوانی بیبینن!
ئه‌م ده‌نگۆیانه‌ قسه‌كانی وه‌زیری پارێزگاكانی عێراق پشت راست ده‌كه‌نه‌وه‌ كه‌ له‌ كاتی بریندار بوونی مقتدا سه‌در له‌ مه‌رقه‌دی حه‌زره‌تی عه‌لی دا وتی: "زۆر سه‌یره‌! له‌و ڕۆژانه‌دا كه‌ هیچ تێكهه‌ڵچوون و گه‌لله‌بارانێك له‌ مه‌رقه‌دی حه‌زره‌تی عه‌لی و ده‌وروبه‌ردا رووی نه‌داوه‌، مقتدا سه‌در بریندار بوونی خۆی راده‌گه‌یه‌نێ."
هه‌ڵاتنی مقتدا سه‌در بۆ ئێران و مانه‌وه‌ی له‌وێ، راست ئه‌و زه‌مینه‌ ئاماده‌ ده‌كان كه‌ ئه‌مریكا ده‌یهه‌وێ. واته‌ ده‌ست تێوه‌ردانی سه‌ربازی ئێران له‌ رووداوه‌كانی عێراقدا!
سه‌رچاوه‌: پیك نیت