ئیمڕۆ له‌ کرماشانه‌وه‌ یه‌کێک له‌ وێنه‌کانی ده‌ورانی منداڵی خۆمیان بۆ ناردووم! من ئه‌م وێنه‌یه‌م به‌ منداڵی دیبوو، به‌ڵام دوایی که‌ گه‌وره‌ بووم نه‌مدیه‌وه، که‌چی دوێنه‌ ئه‌ویش له‌ شێوه‌ی دیجیتاڵدا گه‌یشته‌وه‌ ده‌ستم، هه‌ر بۆیه‌ زۆر زۆر خوشحاڵم. یادی به‌خێر بێ کاتێک منداڵ بووین بابه‌م وێنه‌ی زۆری ده‌گرتین، ئه‌و دیمه‌نانه‌ی که‌ خۆی پێی دڵگیر ده‌بوو یان ئه‌و میوانانه‌ی که‌ خۆشیانی ده‌ویست وه‌ک خزم و که‌س و کار وێنه‌یانی ده‌گرت. ئالبوومێکمان هه‌بوو، له‌به‌ر ئه‌وه‌ نه‌فه‌وتێ دایکم له‌ نێو یه‌غانێکدا شاردوویه‌وه‌ و کلیلێکی زلیشی له‌ درگاکه‌ی دابوو. هه‌ر کاتێک بێتاقه‌ت ده‌بووین ئالبوومی ده‌رده‌هێنا و چاومان له‌ وێنه‌کان ده‌کرد، ئه‌و کاتانه‌ ئیتر وه‌ک جێژن وابوو، لانی که‌م بۆ من وابوو. دیاره‌ ئه‌و کاته‌ له‌ ناوچه‌ی ئێمه‌دا ته‌نیا بابه‌م کامیرای وێنه‌گری هه‌بوو، ئه‌ویش له‌ جۆری ئاڵمانی و فیلنی 135 میلمی ده‌خوارد. باش له‌ بیرمه‌ فیلمێکی باشی له‌ وێنه‌ی جوان جوان گرتبوو و ئاماده‌ی کردبوو بیباته‌ شار بیشۆرێته‌وه‌، منیش به‌ دزییه‌وه‌ چه‌سپی سه‌ر فیلمه‌که‌م کرده‌وه‌ و فیلمم راکێشا هه‌تاکوو کۆتایی، له‌ خۆمدا ده‌مهه‌ویست چاو له‌ نیگاتیڤه‌کانی بکه‌م، هێنده‌ بێ عه‌وقه‌ڵ بووم پێم وابوو پێش ئه‌وه‌ی فیلمه‌که‌ بشۆرنه‌وه‌، نیگاتیڤه‌کانی دیارن!! دایاره‌ زۆریش گه‌وره‌ نه‌بووم. بابه‌یشم زانی کاری منه‌ و زۆر تووڕه‌ بوو، ئیتر له‌ بیرم نیه‌ کوته‌کم خوارد یان نه‌، چوونکه‌ هێنده‌ کوته‌کم له‌ به‌ر کاری سه‌یر و سه‌مه‌ره‌ ده‌خوارد، خۆ له‌ ئه‌ژمار نه‌ده‌هات‌. دیاره‌ کوته‌که‌کان زۆربه‌ی زۆریان خوا هه‌ڵناگرێ حه‌ق بوون، ئێستا که‌ گه‌وره‌ بووم و بووگم به‌ پیاویش هه‌ر پێم وایێ من باشترین بابه‌ی دونیام هه‌بووه‌. ئه‌م وێنه‌یه‌ش له‌ هه‌واره‌که‌مان "چاڵاوه"ی شاهۆ له‌ نزیک ڕه‌شماڵ "ده‌وار"ه‌که‌ی خۆماندا گیراوه‌ له‌ گه‌ڵ گه‌ماڵه‌کان که‌ پێم وابێ ئه‌و کاته‌ له‌ منیان خۆشتر گه‌ره‌کبوون.ها ها ها، تاکوو من هاتم بۆ پێشمه‌رگایه‌تیش هه‌میشه‌ دووگه‌ماڵمان هه‌بوو و خواردن و بوجه‌ی تایبه‌تی خۆیان هه‌بوو که‌ به‌یانیان و ئێواران یه‌کێک له‌ منداڵه‌کان ده‌بووین به‌ مامووری دابه‌ش کردنی نان به‌ سه‌ر گه‌ماڵه‌کاندا.خوای نه‌کردایه‌ نانی گه‌ماڵه‌ بۆرمان له‌ بیر بچوایه‌، ئه‌وا ئیتر زۆر خراپ تووڕه‌ ده‌بوون لێمان. ده‌بوا نانه‌کانیشان له‌ نزیک یه‌که‌وه‌ پێنده‌ین چوونکه‌ به‌ شه‌ڕ ده‌هاتن و ده‌بوو به‌ یه‌ک هه‌راو فه‌رته‌نه‌یه‌ک خوابه‌کم نه‌یوێنن، به‌ڵام له‌ به‌ر بزێوی هێندیک جار هه‌ردوو کۆنانه‌که‌م له‌ نزیک یه‌که‌وه‌ داده‌نا و ده‌بوو به‌ شه‌ڕه‌ گه‌مالێک،حه‌یا حه‌ی، تاکوو یه‌کێک له‌ گه‌وره‌کانی ماڵ نه‌هاتبایه‌ته‌ ده‌رو تێیانی نه‌خڕیبا خۆ لێک نه‌ده‌بوونه‌وه‌، ده‌شیانزانی که‌ گه‌ماڵه‌ بۆر زۆرداره‌ و به‌شه‌که‌ی گه‌ماڵه‌ "کورگ" ده‌خوا مه‌جبوور ده‌بوون خواردنێکی دیکه‌ که‌ زۆر جار له‌وه‌ی پێشوو چه‌ورتر و به‌ تام و له‌زه‌تتر ده‌بوو بنرێته‌ به‌رده‌م سه‌گه‌ کوڕگ و ده‌بوا وه‌ک نیگابانیش به‌لایه‌وه دانیشین تاکوو دیخوا. یاد و بیروه‌ری ئه‌و کاته‌ زێڕینانه‌ به‌خێر بێ که‌ تازه‌ قه‌د گه‌ڕانه‌وه‌یان بۆ نیه‌. ئه‌مه‌ش وێنه‌که: