كاك سالار سه‌رلكمان بوو، ئێمه‌ش ئه‌وكاته‌ی كه له گه‌ڵی چووین بۆ ناوچه‌ی كامێران دووازده‌ یان سیانزده كه‌س ده‌بووین.
كاك سالار به شه‌مسوڵا و ئه‌حله‌ مسری (شه‌هید ئه‌حمه‌د مزه‌فه‌ری، ئه‌و كاته‌ جێگری سه‌رلك بوو، شه‌هید شه‌مسوڵاش سه‌رپه‌ل بوو) و ده‌سته‌یه‌ك له‌ پێشمه‌رگه‌كانی وتبوو، ئێوه‌ بڕۆنه‌وه‌ بۆ ناوچه‌ی بێڵه‌وار و كاك شاپوور (شه‌هید شاپور فیروزی، ئه‌و كاته‌ فه‌رمانده‌ری هێزێ بێستوون بوو) و ده‌سته‌كه‌ی دیكه‌ش ده‌گه‌ڕێنه‌وه‌ بۆ لاێ ئێوه. به‌م جۆره‌ هێز یه‌كتر ده‌گرێته‌وه‌. ئێمه‌ش ده‌ڕۆین تا نزیك شاری كامێران و عه‌مه‌لیاتێك ده‌كه‌ین و ده‌گه‌ڕێینه‌وه‌.
ئێمه‌ چووینه‌ كامێران و گه‌ڕاینه‌وه‌، له‌و سه‌ره‌وه‌ بڕیار وا بوو له‌ "چارلی" په‌شاوا، یه‌ك بگرینه‌وه‌. كاتێك ئێمه‌ هاتینه‌وه‌ چارلی، ئه‌وان له‌وێ نه‌مابوون، هه‌ربۆیه‌ ڕۆژی دواتر ئێمه‌ش ئه‌وێمان به‌جێ هێشت و چووین بۆ "كه‌وانه‌ی بزوه‌ش"، پێمان وا بوون ئه‌وان له‌وێن. دیاره‌ ئه‌و كاته‌ بێسیم و كه‌ره‌سته‌ی پێوه‌ندی گرتن نه‌بوو و ئه‌گه‌ر له‌ یه‌كتری هه‌ڵبڕابایه‌ین، ئیتر ئاگامان له‌ یه‌كتری نه‌ده‌ما. گه‌یشتینه‌ كه‌وانه‌ی بزوش، له‌وێش نه‌بوون. ئێمه‌ لێره‌ ماینه‌وه‌ كه‌ هه‌واڵیان بۆ هێناین، ئه‌وا حكومه‌ت هێزێكی یه‌كجار زۆری له‌ ناوچه‌كه‌ كۆ كردووه‌ته‌وه‌ و ده‌ێهه‌وێ هێرش بكا. دیاره‌ پێشتر كاك سالار و فه‌رمانده‌كانی دیكه‌ هه‌موویان ده‌یانزانی كه‌ هێزێكی زۆر له‌م ناوچه‌یه‌ كۆ كراوه‌ته‌وه‌. ده‌بێ ئه‌وش بڵێم كه هه‌موو ساڵێك ئه‌م ده‌مانه‌، كۆماری ئیسلامی ئێران، یه‌ك حه‌وتووی به ناوی "حه‌وتووی جه‌نگ" دیاری ده‌كرد و به‌و بۆنه‌وه‌ هه‌موو هێزێ خۆی له‌و شوێنانه‌ی كه‌ شه‌ڕی لێ بوو كۆ ده‌كرده‌وه‌. زۆر سه‌یره‌، چوونكه وڵات هه‌م له‌گه‌ڵ عێراق و هه‌میش له‌ ناوخۆ له‌گه‌ڵ كورد له‌ شه‌ڕدا بوو و و ڕۆژ نه‌بوو شه‌ڕ و كوشتن له گۆڕێدا نه‌بێ! به‌ڵام سه‌ره‌ڕای ئه‌وش حه‌وتوویه‌كیان بۆ شه‌ڕ ته‌رخان كردبوو!
كه‌ پێشمه‌رگه‌كانیشمان لێره‌ نه‌دیته‌وه‌، ئێتر زانیمان كه‌ ده‌بێ له‌ "ته‌نگی خاو" دا بن. (ده‌بێ لێره‌دا ئه‌م پرانتزه‌ بكه‌مه‌وه‌ و تۆزێك باسی ئه‌و شوێنه‌ی كه‌ پێی ده‌ڵێن ته‌نگی خاو بكه‌م، دۆڵێكی ته‌نگه‌ كه‌ ئاسمان نه‌بێ هێچ شوێنێكی دیكه‌ی پێوه‌دیار نێه‌، سه‌رێكی له‌ ئاوایی "ته‌نگی وه‌ر"ه‌وه‌ ده‌ست پێده‌كا و له‌ "دووئاوان"ی پشتی ئاوای "تیله‌كۆ"وه ده‌رده‌چێ، سه‌رێكیشی ده‌چێته‌وه‌ بۆ لای "قه‌ڵا" كه‌ له‌ سه‌ر لووتكه‌ی چیای شاهۆ هه‌ڵكه‌وتووه‌ و بۆ خۆی مێژوویه‌كی تایبه‌تیی هه‌یه‌ و داستانێ زۆری له‌سه‌ر وتراوه‌ كه‌ من له‌وانه‌ ده‌گه‌ڕێم. له نێو ئه‌م ته‌نگێ خاوه‌دا كوروو (ئه‌شكه‌وتی ته‌نگی تنگی خاو هه‌ڵكه‌وتووه‌ كه گوایه‌ بنه‌ماڵه‌ی حاجی رۆسته‌م به‌گ كه‌ به‌ خزمایه‌تیش له‌گه‌ڵ ئێمه‌ یه‌كێكن، به‌هاران چه‌ند سه‌د سه‌ر مه‌ڕ و ماڵاتیان له‌م ئه‌شكه‌وته‌دا راگرتووه‌ و وه‌ك گه‌وڕ و گه‌له‌خان كه‌ڵكیان لێوه‌رگرتووه‌. تۆزێك سه‌ره‌وه‌ی ئه‌شكه‌وته‌كه‌ش، كانییه‌كه‌ی ته‌نگی خاوه‌ كه‌ جێگه‌یه‌كی زۆر با سه‌فا و شوێنی حه‌سانه‌وه‌ی پێشمه‌رگه‌ بوو. له به‌هاراندا ته‌نگی خاو لافاو (سێڵاو)یشی لێ هه‌ڵده‌ستێ، به‌ڵام هاوینان له‌ توونیشدا بمری، بێجگه‌ له‌ كانییه‌كه‌ نه‌بێ، دڵۆپه‌یه‌ك ئاوت وه‌دست ناكه‌وێ، دۆڵه‌كه‌ی ته‌نگی خاو له‌ خواریشه‌وه‌ به‌شێكی دیكه‌ی لێ جیاده‌بێته‌وه‌ كه‌ ده‌بێته‌ "حه‌شه‌كه‌ل" و ده‌ڕواته‌وه‌ بۆ پشت ئاوایی "پاڵنگان" كه‌ ئه‌ویش بۆ خۆی مێژووی كۆنی خۆی هه‌یه‌. نێو چۆمه‌كه‌ له‌و شوێنانه‌ی كه‌ زۆر ته‌نگه‌به‌ره‌، ته‌نیا چه‌ند میتر ده‌بێ، به‌ڵام هه‌تاكوو بۆ سه‌ر لووتكه‌كه‌ هه‌ڵكشێی به‌ربڵاوتر ده‌بێت و ڕه‌نگه‌ له‌ كۆتاییدا خۆی له‌ 500 میتر بدا. به‌رزایی ته‌نگیخاو له‌ نێو چۆمه‌كه‌وه‌ تاكوو سه‌ر لووته‌، ڕه‌نگه‌ خۆی له‌ یه‌ك كیلومیتر بدا. ئێتر چڕ و پڕی و خه‌ختی مای هه‌زاره‌وهه‌زار هه‌ر بۆ باس كردن نابێ.) شه‌و له‌ كه‌وانه‌ی بزوه‌ش ماینه‌وه‌، به‌یانی ئێواره‌ من و چه‌ند پێشمه‌رگه‌ی دیكه‌ی خه‌ڵكی زیوه‌ و كاك ئه‌ڕه‌حمان چووین بۆ ئاوایی "زیویه‌" (ئه‌و كاته‌ زیوه‌ چه‌ند كوڕه‌ باشه‌ و ئازای پێشمه‌رگه‌ بوون). كه‌ چووینه‌ نێو دێ و چووینه‌ نێو ماڵه‌كان زانیمان كه‌ وه‌زعه‌كه‌ ئاسایی نیه‌. كه‌ داوای نان و چایمان كرد و خه‌ریك بووین هێندێك نان كۆبكه‌ینه‌وه‌. خه‌ڵك وتیان: كوره‌ ماڵتان نه‌شێوێ، ئه‌وه‌ لێره‌ چی ئه‌كه‌ن! ئه‌وه‌ هێزێكی یه‌كجار زۆر چاش و پاسدار به‌ چه‌ندین ماشێنه‌وه‌ له‌ پایگاكه‌ی پشت دێ كۆبووه‌ته‌وه‌. نه‌ك ته‌نیا ئاوایی زیوه‌یه‌، به‌ڵكوو هه‌موو ئاوایه‌كانی بێڵه‌وار و ده‌وره‌به‌ریشی پڕ كردووه‌ له‌ هێزه‌كانی خۆی و به‌ته‌مایه‌ به‌یانی هێرش بكاته‌ سه‌رتان.
هه‌رچۆنێك بوو ئێمه‌ به‌ په‌له‌ هێندێك نان و پێخۆرمان كۆ كرده‌وه‌ و هێسترێكمان له‌ دێ هێناو و شته‌كانیمان لێ ناو و چووینه‌وه‌ بۆ كه‌وانه‌ی "بزوه‌ش". كه‌ گه‌یشتنه‌ لای هاوڕێیان، به‌سه‌رهاتی كۆكردنه‌وه‌ی هێزێكی زۆر له‌ جاش و پاسداره‌كانمان بۆ كاك سالار و پێشمه‌رگه‌كان باس كرد. (ئه‌و كاته‌ باو بوو كه‌ باوه‌ڕیان به‌ شتێك نه‌بووایه‌، ده‌یانوت، كوره‌ گوێ له‌ قسه‌ی فه‌لا مه‌گره‌). له‌ بیرمه‌ ئه‌نوه‌ر نیه‌ری (شه‌هید ئه‌نوه‌ر مه‌نبه‌ری) وتی كوره‌ گوێ مه‌ده‌ن، ئه‌وه‌ گشتی شایه‌عه‌ی فه‌لایه‌). هه‌رچۆنێك بێ ئێمه‌ ده‌مانزانی شتێك ده‌قه‌ومێ، كاك سالاریش له‌ پێش ئێمه‌وه‌ دیزانی، به‌ڵام له‌به‌ر ئه‌وه‌ی ته‌ئسیر خراپی له‌ سه‌ر ئێمه‌ نه‌بێ، هیچی نه‌ده‌وت. ده‌نا دیاربوو كه‌ زۆر نگه‌رانه‌ و شته‌كه‌ی به‌ جددی گرتووه‌. له‌به‌ر ئه‌وه‌ ئه‌و سه‌ر لكی ئه‌و پێشمه‌رگانه‌ بوو، ده‌یزانی كه‌ ئه‌گه‌ر له‌گه‌ڵیان نه‌بێ، باردۆخه‌كه‌ باش نابێ.
دوای ئه‌وه‌ی ئێمه‌ مه‌سه‌له‌كه‌مان بۆ باس كرد. وتی ده‌زانم ئه‌وه‌ نامه‌م ناردووه‌ بۆیان بۆ ئه‌وه‌ی ئه‌مشه‌و بگه‌ڕێنه‌وه‌ بۆ ئه‌مبه‌ر.
جا هاوكات كه‌ ئێمه‌ چووین بۆ زیوه‌یه‌ عه‌به‌ ج. و سه‌عید زیویه‌یشی ناردبوو بۆ ئاوایی "سیویه‌" بۆ ئه‌وه‌ بزانن پێشمه‌رگه‌كانی هێز له‌وێن یان نه‌. هه‌مان كاتیش نامه‌یه‌كی بۆ ئه‌حله‌ مسری و شه‌مسوڵا و پێشمه‌رگه‌كانی دیكه‌ نووسیبوو و دابووی به‌ نادر (شه‌هید نادر لۆنی) و به‌ختیار (شه‌هید به‌ختیار ته‌نگیسه‌ری) كه‌ بۆیان ببه‌ن و له‌ نامه‌كه‌شدا نووسیبووی كه‌: ئه‌وه‌ ئێمه‌ له‌ كه‌وانه‌ی بزوه‌ش چاوه‌ڕوانی ئێوه‌ین و به‌ گه‌یشتنی ئه‌م نامه‌یه‌ ئیمشه‌و بێنه‌ ئه‌مبه‌ره‌وه‌ بۆ لای ئێمه‌.
نادریش له‌ جێگای ئه‌وه‌ یه‌كڕاست بڕوا بۆ لای پێشمه‌رگه‌كان و نامه‌كه‌یان پێ بدا، راست لێیدابوو بۆ گازرخانی بۆ لای خزمه‌كانی. هه‌ر بۆه‌ شه‌و دره‌نگان ده‌گه‌نه‌ لای پێشمه‌رگه‌كان و نامه‌كه‌ ده‌ده‌ن به‌ ئه‌حله‌ مسری. ئه‌حله‌ مسریش له‌به‌ر ئه‌وه‌ بۆ خۆی نه‌یده‌توانی نامه‌ خوێنێته‌وه‌، نامه‌كه‌ی راگرتبوو تاكوو به‌یانی كه‌ پێشمه‌رگه‌كان هه‌ڵده‌ستن و بۆی ده‌خوێننه‌وه‌.
ئێواره‌كه‌شی ده‌سته‌كه‌ی ئه‌حله‌ مسری و شه‌مسوڵا، چه‌ند پێشمه‌رگه‌یان ناردبوو بۆ ئاوایی "مێسوورا" و "تێله‌كۆ" و ده‌وره‌به‌ر و مه‌ڕ و بزنیان كڕیبوو و هێنابوویان له‌وێ به‌ستبوونیانه‌وه‌ بۆ ئه‌وه‌ی به‌یانی بیكه‌ن به‌ كه‌باب بۆ پێشمه‌رگه‌كان. وایان دانابوو كه‌ به‌یانی كه‌بابێكی باشی لێ بخۆن و ئێنجا بڕۆن بۆ لای كاك سالار و هاوڕێیانیتر.
ئێمه‌ش هه‌تاكوو به‌یان نه‌خه‌وتین، دیاره‌ ئێمه‌ جاروباره‌ چاومان ده‌چووه‌ خه‌و، به‌ڵام كاك سالار نه‌خه‌وت و تاوێك نه‌ تاوێك ده‌چووه‌ سه‌ر ڕێگاكان و چاوی لێ ده‌كرد بزانێ پێشمه‌رگه‌كان نایه‌نه‌وه‌. یان ڕه‌نگه‌ هاتبوونه‌وه‌ و له‌ ماندوویدا بڕی لای ئێمه‌یان نه‌كردبێت و له‌ خواره‌وه‌ خه‌وتبن. هه‌رچۆنێك بوو به‌ نگه‌رانی و چاوه‌ڕوانی ڕۆژمان لێ بووه‌وه‌.
ڕۆژمان له‌ هه‌وا و سه‌رما و زوقمێكی زۆر تووند و تیژدا كرده‌وه‌. هه‌وا ڕووناك بوو، ئاگرێكمان كرده‌وه‌ و له‌ ده‌وری دانیشتین، خه‌ڵكی ئاویش كه‌ ئاگره‌كه‌یان دیبوو، دانه‌ دانه‌ و دووان دووان هاتن بۆ لامان. ئێمه‌ش كه‌ چاومان لێ كرد ئه‌وه‌ له‌ سه‌ره‌وه‌ی ئێمه‌ كێوی "یه‌كشه‌وه‌" جاش و پاسدار كردوویانه‌ به‌ بان به‌رزاییه‌كاندا! ئێتر به‌ ته‌واوی زانیمان كه‌ باردۆخه‌كه‌ زۆر زۆر جددییه‌.
چی بكه‌ین و چی نه‌كه‌ین، كاك سالار وتی بڕۆین بۆ لای ئاوایی "بزوه‌ش". دیاره‌ ئاوایش مۆڵگه‌یه‌كی هێزه‌كانی رژێمی لێ بوو. ئێمه‌ش به‌ هه‌موو رێگایه‌كدا لێماندا بۆ نزیك ئاوایی بزوه‌ش. له‌ نزیك خه‌رمانێكه‌وه‌ تماشا ده‌كه‌ین ئه‌وه‌ سه‌عید و عه‌به‌ش له‌ نێو كادا بۆی خه‌وتوون. دیاره‌ شه‌و كه‌ گه‌ڕابوونه‌وه‌، له‌ ماندووییدا بڕی لای ئێمه‌یان نه‌كردبوو و له‌وێ له‌ نێو كا گه‌رمه‌كه‌دا خه‌وتبوون.
هه‌ڵمانساندن و هه‌موو پێكه‌وه‌ به‌ره‌وه‌ لای ئاوای كه‌وتینه‌ڕێ، له‌ نزێك ئاواییه‌وه‌ هه‌ڵگه‌ڕاینه‌وه‌ بۆ پشت دێ، كه‌ كێوێك بوو و ئه‌گه‌ر له‌وێشه‌وه‌ بڕۆیته‌ سه‌ره‌وه‌، ده‌بوو به‌ ئاواییه‌كانی "گڵیان" و "په‌شاوا".
ئه‌وكاته‌ش هێنده‌ هێرشه‌كه‌ به‌ربڵاو بوو و هێنده‌ جاش و پاسدار ڕژابوونه‌ ناوچه‌كه‌ هه‌ركه‌س ده‌سته‌یه‌كی چه‌كداری ببینابایه‌، پێی وابوو ئه‌وه‌ له‌ خۆیانه‌ و كاریان پێ نه‌بوو، شكیشان بۆ ئه‌وه‌ نه‌ده‌چوو كه‌ ئێمه‌ له‌ ناوه‌ڕاسیتانداین و به‌و ڕۆژه‌ رووناكه‌ تێكه‌ڵیان بووین، پێشمه‌رگه‌ بین! كاتێكیش به‌ لای ئه‌وایدا تێپه‌ڕین هه‌موو خه‌ڵكی ئاوای و چه‌كداره‌كانی مۆڵگه‌كه‌ش ئێمه‌یان ده‌بینی. دیاره‌ خه‌ڵك ده‌یانناسینه‌وه‌، به‌ڵام ئه‌وانه‌ی مۆڵگه‌كه‌ پێیان وابوو ئێمه‌ش له‌ گروی زه‌ربه‌ت و سه‌ر به‌و هێزه‌ هێرشكه‌ره‌كه‌ین كه‌ تازه‌ هاتوونه‌ته‌ ناوچه‌كه‌ و هه‌ر بۆیه‌ كاریان به‌ سه‌ر ئێمه‌وه‌ نه‌بوو. له‌و كاته‌دا كه‌ ده‌مانه‌ویست له‌ سه‌ر یاڵه‌كه‌ بڕۆینه‌ سه‌ره‌ره‌وه‌، ده‌سته‌یه‌كی له‌ جاش و پاسداره‌كان كه‌ چووبوونه‌ "یه‌ك شه‌وه‌" و له‌وێوه‌ هاتبوونه‌وه‌ به‌ره‌وه‌ ئه‌و شوێنه‌، هاوكات ئه‌وانیش بۆ هه‌مان شوێن ده‌هاتن، كه‌ ئێمه‌ نیازمان بوو بۆی بڕۆین. دیاره‌ ئه‌وان راسته‌و راست به‌ سه‌ر یاڵه‌كاندا ده‌چوون و ئێمه‌ش له‌ ژێره‌وه‌، لابه‌لا ده‌چووین.
ئه‌مه‌ له‌ شه‌ڕی پارتیزانیدا زۆر گرنگه‌ كه‌ ئه‌وه‌ی شوێنه‌ ستراتژیكه‌كانی به‌ ده‌سته‌وه‌ بێ، زاڵتره‌. هه‌ر بۆیه‌ ئێمه‌ و ئه‌وانیش تێده‌كۆشاین زووتر له‌وی دیكه‌ لووتكه‌كه‌ به‌ ده‌سته‌وه‌ بگرین. دیاره‌ یـ. زیویه‌یی له‌گه‌ڵ ئێمه‌ بوو، زۆر چست و چالاك بوو و هه‌ڵات و لووتكه‌ی به‌ ده‌سته‌وه‌ گرت. دیاره‌ هه‌ردوو لا پێكه‌وه‌ گه‌یشتنه‌ هه‌مان جێگا و له‌ به‌ر ئه‌وه‌ یـ. ز. پێشتر به‌ ده‌ست هات و ڕه‌گبارێكی لێ كردن، كردیان به‌ شه‌ڕ و ئێمه‌ش له‌و كاته‌دا گه‌یشتینه‌ ئه‌وێ، بوو به‌ شه‌ڕێكی زۆر تووند و تیژ و ئه‌وان به‌ كوژراوه‌وه‌ مه‌جبوور بوون پاشه‌كشه‌ بكه‌ن.
هێشتا یـ. ز. خه‌شابێكی ته‌واوی نه‌ته‌قاندبوو كه‌ له‌ "ته‌نگی خاو" بوو به‌ ته‌قه‌یه‌كی تووند و تیژ، كه‌ ئێمه‌ گوێمان لێ ده‌بوو. له‌به‌ر ئه‌وه‌ ئه‌و كێوانه‌ی ده‌وروبه‌ری ته‌نگی خاو ده‌نگیان ده‌دایه‌وه‌، ئێتر هێنده‌ی تر ته‌قه‌كه‌ گه‌وره‌تر ببووه‌وه‌. ببوو به‌ ڕۆژی حه‌شر، سی چل ئارپ جی و خومپاره‌ به‌ جارێك ده‌ته‌قان. بێجگه‌ له‌مانه‌ش جاشه‌كانی جوانڕۆ له‌و دیوه‌وه‌ له‌ شاهۆوه‌ هاتبوونه‌ سه‌ره‌وه‌ و له‌ پشته‌وه‌ بان سه‌ر تانگی خاویان گرتبوو و تێربار قه‌ناسه‌یه‌كیان پێ بوو كه‌ هه‌ر گڕڕه‌ی ده‌هات و وه‌ك كه‌و ده‌یخوێن. له‌و شوێنه‌، حه‌یبه‌ڵا نیگابان ببوو، پێیانێ نه‌یزانیبوو تاكوو هاتبوونه‌ نزیكیان!
ده‌بێ ئه‌وه‌ش بڵێم كه‌ تۆزێك پێش ئه‌م روودا و هه‌راوبه‌زمه‌ش، شه‌مسوڵا به‌یانی زوو له‌ خه‌و هه‌ستابوو و چووبوو بۆ كه‌و كوشتن، هه‌ر بۆیه‌ كڵاشینكۆفه‌كه‌ی خۆی به‌ دار گوێزه‌كه‌ی سه‌ر كانیه‌كه‌وه‌ هه‌ڵواسیبوو و ژ3یه‌كی له‌گه‌ڵ خۆی بردبوو، له‌و كاته‌دا شه‌مسوڵا ته‌قه‌ له‌ كه‌و ده‌كا، جاش و پاسداریش واده‌زانن ئه‌وه‌ پێشمه‌رگه‌ پێی زانیون و هه‌ر بۆیه‌ ته‌قه‌ ده‌كه‌ن! بۆیه‌ ئه‌وانیش ئه‌م حه‌شره‌یان ده‌ست پێ كردبوو. ئێتر پێشمه‌رگه‌ش كه‌ له‌ سه‌ر كانی و ئاوه‌كه‌ له‌ خه‌ودا ده‌بن، هه‌ر كه‌سه‌و به‌ره‌و لایه‌ك ده‌چن. ئێتر هه‌ر توانیبویان خۆیان ده‌رباز بكه‌ن، هێ وا هه‌بوو نه‌یتوانیبوو لێباس و كه‌وشه‌كانیشی بێنێ.
هه‌ركه‌سه‌ و به‌ شێوه‌یه‌ك به‌ نێو ته‌نگی خاودا داده‌كێشنه‌ خواره‌وه‌ و هه‌ر كه‌سه‌ له‌ شوێنێك خۆی ده‌شارێته‌وه‌. شه‌مسوڵاش هه‌ر جۆرێك بوو خۆی گه‌یاندبووه‌وه‌ سه‌ر كانی و ئاوه‌كه‌ و كڵاشێنكۆفه‌كه‌ی خۆی هێنابوو. (بۆ خۆی ئه‌م گه‌ڕانه‌وه‌ی بۆ سه‌ر كانی و ئاوه‌كه‌ گه‌ڕانه‌و، كه‌ بۆ خۆی داستانێكی حماسییه‌، كه‌ چۆن له‌ دڵی خۆیدا بڕیار ده‌د كه‌ ده‌بێ حه‌تمه‌ن بچێ و كڵاشێنكۆفه‌كه‌ی بێنێ و هه‌تاكوو ئه‌و ده‌ڕوا سه‌ر كانی و ئاو پڕه‌ له‌ چاش و پاسدار، چۆن له‌گه‌ڵیان په‌شه‌ڕ دێ و چۆن چه‌كه‌كه‌ی دێنێ و بۆی ده‌رباز ده‌بێ، له‌ كاتی گه‌ڕانه‌وه‌دا مرۆڤ مووچركی به‌ له‌شدا ده‌ها، ئه‌مه‌ش ڕه‌نگه‌ مێنێ بۆ جارێكی دیكه‌)
له‌م شه‌ڕه‌شدا حه‌یده‌ر پشته‌یی شه‌هید بوو، حه‌یده‌ر له‌ پێشدا چووبووه‌ خواره‌وه‌ و به‌ڵام دوایی گه‌ڕابووه‌وه‌ بۆ سه‌ر كانیه‌كه‌ و جاشی جوانڕۆیش له‌وێ زۆر نامه‌ردانه‌ شه‌هیدیان كردبوو. دیاره‌ حه‌یده‌ر بۆ خۆشی به‌ڕاستی هێنده‌ به‌ ده‌ست و برد و ئاز نه‌بوو، ده‌نا ئه‌ویش وه‌ك هاڕێكانی دیكه‌ی خۆی ده‌رباز ده‌كرد. تازه‌ پێشتریش خۆی ده‌رباز كردبوو، به‌ڵام كه‌س نازانێ بۆ گه‌ڕاوه‌ته‌وه‌ بۆ سه‌ر كانیه‌كه‌! عوسمانیش گه‌شكیش زۆر له‌ پێشمه‌رگه‌كان دوور كه‌وتبووه‌وه‌ و هاتبوو بۆ به‌ر درگای ته‌نگی خاو بۆ نزیك "ته‌نگیوه‌ر"، جاشی جوانڕۆیی ئه‌ویشیان شه‌هید كردبوو. (پێشمه‌رگه‌كان گوێیان لێ ببوو كه‌ جاشێكی جوانڕۆیی ته‌قه‌ له‌ شه‌هید عوسمان ده‌كا و ناوێرێ بڕواته‌ سه‌ری و بانگ له‌ جاشێكی تر ده‌كا و ده‌ڵێ: هۆ عه‌لی عه‌لی بێ بۆ ئێره‌، ئه‌وه‌ دانێكیانم زامدار كردگه‌).
سه‌ید محه‌ممه‌دێكی هه‌ژاری خه‌ڵكی "سه‌رچی"ش پێشمه‌رگه‌ بوو، زۆر فه‌قیر و هه‌ژارۆكه‌ بوو، هه‌ر خه‌ریكی وڵاخداری و كاری له‌م چه‌شنه‌ بوو، پێشمه‌رگه‌ی شه‌ڕكه‌ر نه‌بوو. جاشه‌كان ئه‌ویش به‌ برینداری ده‌گرن و ده‌یبه‌ن بۆ ئاوای "تیله‌كۆ". به‌ڵام به‌ پێچه‌وانه‌ی چاوه‌ڕوانی پێشمه‌رگه‌ و خه‌ڵك كه‌ سه‌ید محه‌ممه‌د زۆر ساكار و ساده‌یه‌ و ڕه‌نگه‌ زۆر بیشپاڕێته‌وه‌ بۆ ئه‌وه‌ی نه‌یكوژن، له‌ نێو دێدا ده‌ست ده‌كا به‌ دروشمدان و جنێودان به‌ جاش و پاسداره‌كان و مه‌قاومه‌تێكی زۆر باشی كردبوو. ئێتر له‌وێ هێنده‌ بژی حیزبی دیموكرات و مردن بۆ خومه‌ینی و جاش و پاسداری وتبوو، تاكوو ئیعدامیان كردبوو.
ئێتر به‌م جۆره‌ ئه‌م سێ پێشمه‌رگه‌مان تێدا چوون، به‌ڵام ئه‌وانی دیكه‌ دووان دووان و سیان سیان خۆیان حه‌شار دابوو تاكوو هه‌وا تاریك و ڵێڵ ببوو و دیسان یه‌كیان گرتبووه‌وه‌، بێجگه‌ له‌ ته‌وفیق ئه‌وزاغاجی نه‌بێ كه‌ ڕۆیشتبوو بۆ لای "پیرباخ" و چه‌م "سیویه‌" و نادریش ڕووی له‌ لای ئاوایی مێسوراو كردبو و دوای دوو سێ رۆژی دیكه‌، له‌ "گورگه‌چاڵ" هاته‌وه‌ بۆ لای پێشمه‌رگه‌كان.
ده‌سته‌كه‌ی ئێمه‌ش كه‌ كاك سالارمان له‌گه‌ڵ بوو، به‌ هه‌موو سه‌ر یاڵێكا لێماندا بۆ به‌ین ئاوای بزوه‌ش و "گڵیان" و له‌شه‌وه‌ بۆ پشت "مێرگه‌سار" و "كاشته‌ر" بۆ ئه‌و شوێنه‌ی كه‌ پێیان ده‌وت "سه‌نگه‌ری كۆمه‌ڵه‌". له‌وێشه‌وه‌ چوونیه‌ خواروه‌ بۆ لای "كوچك چه‌رموو" و له‌وێشه‌وه‌ بۆ "ئاویسه‌ر" و ده‌وروبه‌ر. ئه‌و ناوچانه‌ش هه‌میشه‌ پێشمه‌رگه‌ی لێبوو و حكومه‌تیش وه‌ك ئێستا نه‌یده‌وێرا سووك و هاسان به‌و شوێنانه‌دا بێ و بڕوا، چونكه‌ شوێنێك چڕ و به‌رده‌ڵان بوو، ته‌قریبه‌ن وه‌ك ته‌نگی خاو. ئێمه‌ كه‌ داپه‌ڕینه‌ خواره‌وه‌، گه‌یشتنیه‌ نێو مله‌كه‌ی نێوان گڵیان و بزوه‌ش، سه‌یرمان كرد كه‌چی، هه‌ی هۆ خۆ ئه‌وه‌ ئه‌و لایه‌شمان لێ گیراوه‌! ئێتر له‌وێوه‌ هه‌تاكوو "كوڕه‌ی ده‌ژن" به‌ سه‌ر هه‌موو یاڵێكا هه‌موویان لێ گرتبووین. له‌و سه‌ر كێوانه‌ ئه‌وه‌ی لووتكه‌ و به‌رزایی و سه‌نگه‌ر بووه‌ هه‌موویان گرتووه‌!
تۆزێك راوه‌ستاین كه‌ چی بكه‌ین و چی نه‌كه‌ین، بینیمان ئه‌وه‌ پاسداره‌كان له‌ولامانه‌وه‌ به‌ تێخه‌ شانه‌یه‌كدا به‌ره‌و لای ئێمه‌ هه‌ڵده‌كشێن! ئێمه‌ ئیتر ده‌مانزانی كه‌ هیچكاممان ده‌رناچین، كه‌س باوه‌ڕه‌ی نه‌ده‌كرد كه‌ نجاتی ببێ. كاك سالار وتی باشتر وایه‌ بڕۆینه‌ نێو ئاوایی بزوه‌ش. چونكه‌ چاره‌ی دیكه‌مان نیه‌، لێره‌وه‌ به‌رده‌بینه‌وه‌ بۆ نێو ئاوایی بزوه‌ش و شه‌ڕێكی مان و نه‌مان و قاره‌مانانه‌ی بۆ ده‌كه‌ین، چونكه‌ ئێمه‌ تازه‌ هه‌ر تێدا ده‌چین، باشتره‌ له‌ دێدا شه‌ڕێكی باش بكه‌ین و شێرانه‌ له‌ دێدا بمرین تاكوو له‌م كێوانه‌وه‌ بمانكوژن. ئێتر دوای قسه‌كانی كاك سالار، پێشمه‌رگه‌ بۆ گه‌ردن ئازایی و ماڵاوایی كردن له‌ یه‌كتر ده‌ستیان كرد به‌ ده‌ست له‌ مل یه‌كتری كردن و ماچ و مووچ كردن و گه‌ردن یه‌كتری ئازا كردن. هێندێكیشان وه‌سیه‌تیان بۆ هاوڕێكانیان ده‌كرد كه‌ ئه‌گه‌ر ئه‌وان ده‌رچوون دوایه‌ بچن له‌ كوێ چ بكه‌ن و چ نه‌كه‌ن!
كاك سالار مله‌یه‌كی بۆ ده‌ست نیشان كردین وتی ده‌بێ له‌وێوه‌ بڕۆینه‌ ئه‌و دیو، ئێتر زووكه‌ن هه‌ڵێن! ئه‌وه‌ی كوژرا كوژرا و ئه‌وه‌ی ده‌رچوو باشتر، ده‌ی بۆ كه‌یتانه‌. ئه‌م ته‌په‌یه‌ش له‌ به‌ینی مێرگه‌سار و گڵیاندا بوو، له‌وێشه‌وه‌ بۆ چه‌مه‌كه‌ی "هه‌نیه‌من" و له‌وێشه‌وه‌ ئێتر دارستان و چڕ بوو ده‌مانتوانی بڕۆین بۆ چه‌م ژاوه‌رۆ و پیرباخ.
ئێمه‌ كه‌ له‌ مله‌كه‌وه‌ سه‌رمان به‌رز ده‌كردوه‌، پایگاكه‌ی گڵیان دیبینین و ته‌قه‌ی لێ ده‌كردین، هه‌ر سه‌رمان به‌رز ده‌كرده‌وه‌ و به‌ ته‌قه‌ی تیربای ژ3 دایده‌گرتین و له‌ به‌ر ده‌م و لووتماندا ده‌بوو به‌ ته‌پوتۆزێك خوابكه‌م نه‌یبینی، نه‌یده‌شت بڕۆین. له‌و لاشمانه‌وه‌ پاسداره‌كان پێیان زانیبووین ئه‌وانیش ته‌قه‌یان لێ ده‌كردین. ئێت له‌وێدا مابووینه‌وه‌، ده‌چووینه‌ ئه‌و دیو ئه‌وه‌ گڵیان و پڕه‌ له‌ جاش و پاسدار، ده‌چینه‌ ئه‌م دیو بزوه‌شه‌، له‌و خراپتر، به‌ره‌و ئه‌ولا ده‌چووین پاسداره‌ به‌ولادا ده‌چین چاش سه‌ر یاڵه‌كانی لێ گرتبووین، به‌ره‌و دواش ئه‌وه‌ ئێتر له‌ هه‌مووی خراپتر لێمانیان گرتبوو.
ئێتر كاك سالار له‌ باردۆخه‌كه‌ زۆر هه‌راسان بوو، ریزی كردین و سه‌عید كه‌ سه‌رپه‌لمان بوو له‌ به‌ر هه‌موومانه‌وه‌ بوو، كاك سالار پاڵی پێوه‌ ناو قیڕاندی و وتی بڕۆن! ئێتر سه‌عید چوو، كه‌ سه‌عیدیش چوو به‌ودیوا، ئێتر ئێمه‌ش به‌ دواییدا هه‌موومان خۆمان كرد به‌ نێو گولله‌دا كه‌ وه‌ك ره‌هێڵه‌ باران ده‌باری به‌ سه‌رماندا. له‌و دیویشه‌وه‌ به‌ربووینه‌وه‌ بۆ نێو دۆڵێكی دیكه‌ و جه‌ماعه‌تێكمان لێره‌دا زۆرمان بۆ هاتبوو، له‌ هه‌ر كوێوه‌ سه‌رمان ده‌رهێنا، دیسان تیربار ژ3كه‌ دایده‌گرتینه‌وه‌، زۆر خراپ له‌ كه‌نداڵه‌دا رایگرتبووین و ده‌چوونمان نه‌بو! ئه‌وه‌ جاش و پاسداریش هه‌ر نزیكتر و نزیكتر ده‌بنه‌وه‌. حه‌سه‌ن كاوانه‌ییش (دوایی بوو به‌ جاش) كه‌ مێر منداڵێك بوو ئار پی جی یه‌كیان پێدابوو هه‌ڵیگرتبوو، ته‌نیا 1 گولله‌شمان پێ مابوو.
كاك سالار حه‌سه‌نی بانگ كرد و گولله‌ ئار پی جی یه‌كه‌ی ئاماده‌ كرد كه‌ بینێ به‌ پایگاكه‌وه‌. مه‌به‌ستیشی ئه‌وه‌ بوو كه‌ بۆ تاوێك تیربار ژ3ێكه‌یان بێ ده‌نگ بێ و له‌و ماوه‌یه‌شدا ئێمه‌ بتوانین له‌و دۆڵه‌ سه‌ر ده‌ربێنین و خۆمان ڕزگار بكه‌ین. كاتێك كاك سالار په‌نجه‌ی به‌ په‌له‌پیتكه‌ی ئار پی چی دا هێنا ده‌رنه‌چوو! ئه‌ویش تووڕه‌ بوو و ئار پی جی یه‌كه‌ی فڕه‌ داو و نائومێدتر له‌ جاران، به‌ڵام به‌ ئیمانتر له‌سه‌ر ڕێبازه‌كه‌ی و ڕزگار كردنی ئه‌و پۆله‌ پێشمه‌ره‌گه‌ تازه‌ پێگه‌یشتووه‌ كه‌ هیچكاممان له‌ 18 ساڵ زیاترمان نه‌بوو. هه‌ر بۆیه‌ شێرانه‌ گوڕاندی و وتی یاڵا بڕۆن! دیسان هه‌ڵاتین و له‌وێش ده‌رچووین.
من و حه‌سه‌ن كاوانه‌یی و مه‌ولوو بیرای پێكه‌وه‌ بووین، به‌ڵام بێجگه‌ له‌ كاك سالار، كه‌س گوێی له‌ كه‌س نه‌ده‌دا و هه‌موومان ته‌نیا ئاگامان له‌ خۆمان بوو. هه‌ر چۆنێك بوو ئێمه‌ چووین بۆ پشت گڵیان و له‌وێشه‌وه‌ بۆ سه‌ر جاده‌كه‌ و دوایی بۆ لای "مێرگه‌سار". ( باش له‌ بیرمه‌ كه‌ قۆخ و شێڵانه‌ زۆر به‌ داره‌وه‌ بوون، باخ و باخاتێكی زۆر جوانی هه‌یه‌) له‌وێشه‌وه‌ چووین بۆ چه‌م "هه‌نیه‌من"، دیمان ئه‌وه‌ وه‌هاب گومه‌ته‌ییش له‌وێیه‌. (دواتر چوو خۆی ته‌سیلم كرده‌وه‌، به‌ قه‌وڵ پێشمه‌رگه‌كان چووه‌وه‌ بۆ ناو گاگه‌له‌كه‌، له‌ بێ شانسی خۆیا، له‌ كاتی چوونه‌وه‌شدا، كه‌وته‌ كه‌مینی پێشمه‌رگه‌ و برینداریش بوو، به‌ڵام هه‌تاكوو نێو گه‌گه‌له‌كه‌ نه‌وێسا). دیاره‌ له‌ به‌ر هه‌ڵاتن و ماندوو بوون، حاڵی باش نه‌بوو و ده‌ڕشایه‌وه‌.
ئێمه‌ش له‌و چه‌م و دۆڵ و نێو دارستانه‌دا دانه‌ دانه‌ یه‌كتریمان دیته‌وه‌ و چووین بۆ لای پیرباخ و له‌وێش له‌ نێو باخێكدا، تووشی جه‌ماعه‌تێك له‌ پێشمه‌رگه‌كانی كۆمه‌ڵه‌ بووین. پێیان وتین كه‌ پێشمه‌رگه‌یه‌كمان چه‌تره‌كه‌ی به‌ره‌وخوار باز كردگه‌ و لێره‌وه‌ چووه‌. دیاره‌ مه‌به‌ستیان عه‌به‌ بوو. كۆمه‌ڵه‌كانیش لێیان پرسیبوو، جه‌ریان چیه‌؟ به‌ڵام جوابی ئه‌وانیشی نه‌دابوه‌وه‌ و یه‌كسه‌ره‌ كوتابووی بۆ نێو پیرباخ.
كه‌ ئێمه‌ چووینه‌ نێو پیرباخ، كاك شاپور و پێشمه‌رگه‌كانی لكی شه‌هید نادر و جه‌ماعه‌تێك له‌ پێشمه‌رگه‌ی هێزی شه‌ریفزاده‌ش له‌وه‌ێ بوون. ئه‌وانه‌ی هێزی شه‌ریفزاده‌ كه‌ پێشمه‌رگه‌ی سنه‌ بوون، پێشمه‌رگه‌یه‌كی ئازا و قاره‌مانیان به‌ ناوی عه‌به‌ خاڵدار له‌گه‌ڵ بوو كه‌ بریندار ببوو (پێم وابێ ئه‌وه‌كات سه‌رلكلیان بوو).
ئێتر چیمان دیبوو بۆ كاك شاپۆر و هاوڕێكانی دیكه‌مان باس كرد. ئێستا ئێتر هه‌موومان نگه‌رانی پێشمه‌رگه‌كانی ته‌نگی خاو بووین. كه چیان به‌ سه‌ر هاتووه‌! كه‌س به‌ ته‌ما نه‌بوو تاقیان ده‌رچووبێ. (ئه‌و به‌سه‌رهاته‌ی له‌ پێشدا له‌ سه‌ر پێشمه‌رگه‌كان له‌ ته‌نگی خاودا باسم كرد، دواتر خۆیان گێڕایانه‌وه‌، ده‌نا ئێمه‌ هێشتا به‌وه‌مان نه‌زانیبوو و هێشتا دڵه‌خورپه‌ی ئه‌وان دایگرتبووین). هه‌ر بۆیه‌ بڕیاریان دا ئێواره‌ بڕۆینه‌وه‌ و ده‌بێ هه‌ر جۆرێك بووه‌ ئیمشه‌و به‌كه‌ینه‌ ئه‌وبه‌ره‌وه‌ بۆ لای ته‌نگی خاو و بزاین پێشمه‌رگه‌كان چیان به‌ سه‌ر هاتووه‌.
ئێواره‌ چووین و دیسان تووشی پێشمه‌رگه‌كانی كۆمه‌ڵه‌ بووینه‌وه‌. ئه‌وانیش نگه‌رانی ئه‌و باردۆخه‌ بوون كه‌ له‌ ناوچه‌كه‌دا روویدابوو، ده‌بێ ئه‌وه‌ش بڵێم كه‌ ناوچه‌ی بێڵه‌وار ته‌نیا شوێنی پێشمه‌رگه‌ری حیزب بوو و بێجگه‌ له‌ كامێران و دوایش له‌ شایه‌نی نه‌بێ كه‌ بنكه‌ی پێشمه‌رگه‌ی كۆمه‌ڵه‌ی لێبوو، له‌ بێڵه‌وار نه‌بوون هه‌ر بۆیه‌، پێشمه‌رگه‌ی كۆمه‌ڵه‌ هێنده‌ شاڕه‌زای ناوه‌چه‌كه‌ نه‌بوون و بۆیه‌ ئه‌وانیش داوایان له‌ كاك شاپور و كاك سدیق بابایی (ئه‌و كاته‌ كه‌ سدیق به‌رپرسی ته‌شكیلاتی هێزێ بێستوون بوو) كرد كه‌ ئه‌وانیش له‌گه‌ڵ ئێمه‌ بێن. هه‌ر بۆیه‌ ئه‌وانیش كه‌ نزیك ده‌كه‌سێك ده‌بوون له‌گه‌ڵ ئێمه‌ هات و شه‌و پێكه‌وه‌ چووینه‌ "مێرگه‌سار" له‌وێ شاممان خوارد و له‌وێشه‌وه‌ به‌ به‌ینی ئاواییه‌كانی كاشته‌ر و بزوه‌شدا چووینه‌ ده‌شتی بێڵه‌وار و له‌وێشه‌وه‌ له‌ لای ئاوای "تیله‌كۆ"وه‌ كردمانه‌ ئه‌وبه‌ره‌وه‌ بۆ لای "گورگه‌چاڵ". شه‌و له‌وێ ماینه‌وه‌ تاكوو به‌شكه‌م كه‌سێك بێ و هه‌واڵێكمان بۆ بێنێ. لێره‌دا تووشی نادر و واسێح (شه‌هید واسێح مه‌نبه‌ری) بووین. له‌وێشه‌وه‌ چووین بۆ لای "كانی دزان" و چاوه‌ڕوانی ئه‌حله‌ مسری و هاوڕێكانی بووین.
ئا لێره‌ دا ده‌بێ شتێك بگێڕمه‌وه‌ كه‌ ڕه‌نگه‌ پێوه‌ندی به‌ شه‌ڕی ته‌نگی خاوه‌وه‌ نه‌بێ، به‌ڵام پێوه‌ندی به‌ حه‌وتووی شه‌ڕه‌وه‌ هه‌یه‌.
له‌م شوێنه‌ كه‌ دانیشتبووین، كانیاوه‌ێكی لێ یه‌ كه‌ له‌ نێو به‌رده‌كه‌دا به‌ ئه‌ندازه‌ی میترێك بۆ قووڵای كونی به‌رده‌كه‌ ئاو هه‌یه‌، ئه‌م شوێنه‌ش ناوی "كانی دزانه" له‌ به‌ر ئه‌وه‌ پێشمه‌رگه‌ زۆر بووین و ئێستا ئیتر جه‌ماعه‌تێك پێشمه‌رگه‌ی كۆمه‌ڵه‌شمان پێ زیاد ببوو. بۆ ئه‌وه‌ی ئاوه‌كه‌ به‌ش بكا، نه‌یانده‌هێشت كه‌س به‌ ئاره‌زووی خۆی ئاو به‌رێ و كه‌سێكیان دیاری كردبوو كه‌ به‌ راده‌ ئاو به‌ پێشمه‌رگه‌ بدا!
پێشمه‌رگه‌كانی كۆمه‌ڵه‌ یه‌كێكیان له‌گه‌ڵ بوو، له‌ ماوه‌یه‌دا كه‌ له‌گه‌ڵ ئێمه‌ بوون، دڵی به‌ پێشمه‌رگه‌كانی ئێمه‌ كرابووه‌وه‌ و له‌ سه‌ر ئه‌م كانیه‌ ده‌یوست بێ بۆ لای ئێمه‌ و ببێته‌ پێشمه‌رگه‌ی ئێمه‌. كۆمه‌ڵه‌كانیش زۆریان پێ ناخۆش بوو و هه‌ر بۆیه‌ خه‌ریك بوون بیكه‌ن به‌شه‌ڕ و پێشمه‌رگه‌یه‌ك سه‌نگه‌ری گرتبوو! كاك سدیقیش وتی، ئه‌و كوڕه‌ بۆ خۆی بڕیار ده‌دا كه‌ له‌ كوێ بێشمه‌رگایه‌تی بكا. له‌ كوڕه‌كه‌یان ده‌پرسی كام لات پێ خۆشه‌؟ خۆی لای ئێمه‌ی پێخۆش بوو. كه‌چی كۆمه‌ڵه‌كان به‌ زۆری ده‌یانویست بیبه‌نه‌وه‌ بۆ لای خۆیان. ئه‌ویش نه‌ده‌چوو. خوه‌لاسه‌ خه‌ریك بوو، له‌سه‌ر كوڕه‌كه‌ تووشی ته‌قه‌ و لێكدان ببین. كاك كاك سدیق به‌ كۆمه‌ڵه‌كانی وت: به‌ نووسراوه‌ بنووسن كه‌ ئێوه‌ ئه‌و كوڕه‌تان به‌ سڵامه‌تی له‌ لای ئێمه‌ بردووه‌ته‌وه‌. ئیتر دوای نووسنی كاغه‌زێك كوڕه‌یان له‌گه‌ڵ خۆیان برد و چوون. ئیتر نه‌مانزانی ئه‌و كوڕه‌ چی به‌سه‌ر هات!
به‌گه‌ڕێمه‌وه‌ سه‌ر به‌سه‌رهاته‌وه‌كه‌:
ئه‌حله‌ مسری و جه‌ماعه‌ته‌كه‌شی به‌ پێچه‌وانه‌ی ئێمه‌ چووبوونه‌وه‌ بۆ ئه‌وبه‌ر بۆ لای پیرباخ و ئه‌و چه‌مو دۆڵی "ژاوه‌رۆ". له‌وێش یه‌ك دوو جار له‌گه‌ڵ پاسداره‌كان كه‌وتبوونه‌ شه‌ڕ.
دیاره‌ پێش ئه‌وی ئه‌وان بدۆزینه‌وه‌، شه‌وی دواتر وتیان ده‌بێ بڕۆین بۆ دوو ئاوای بۆ نان هێنان. من و نادر و حه‌وت هه‌شت كه‌سی دیكه‌یان نارد بۆ ئاوای "گازرخانی" و جه‌ماعه‌تێكیش بۆ "چرۆسانه‌". (كه‌ریم بزوه‌شی به‌رپرسی ئه‌م جه‌ماعه‌ته‌ بوون و حامید درودیش یه‌كێكیان بوو، ئه‌مه‌ش بۆ خۆی داستانێكه‌)
كه‌ گه‌یشتینه‌ گازرخانی لاماندایه‌ هه‌وه‌ڵین ماڵ، زۆر بریسمان بوو، نانمان هاورد و له‌ پاڵ ماڵه‌كه‌دا ده‌ستمان كرد به‌ نانخواردن. من كه‌ چاوم لێ كرد، شتێكم ده‌بینی له‌ سه‌ر بانه‌كه‌وه‌ بریقه‌ی ده‌دایه‌وه‌! پێم وابوو ته‌نه‌كه‌ و شتی وایه‌ له‌ به‌ر مانگه‌شه‌وه‌كه‌دا بریقه‌ ده‌داته‌وه‌. دوای ئه‌وه‌ كه‌ نانمان خوارد، نادر كه‌ ئاوایی گازرخانی باشتر له‌ ئێمه‌ ده‌زانی، وه‌پێش كه‌وت و به‌ته‌ما بووین بڕۆین له‌ چه‌ند ماڵی دیكه‌ نان و پێخۆر كۆ بكه‌ینه‌وه‌.
كه‌ له‌و ماڵه‌ جیا بووینه‌وه‌ و ویستمان له‌ جۆگه‌له‌ ئاوه‌كه‌ بپه‌ڕێینه‌وه‌ و بڕۆین بۆ ماڵه‌كانی دیكه‌، ته‌قه‌ ده‌ستی پێكرد. ئێتر وه‌ك باران گولله‌ ده‌بار، ئێمه‌ش هه‌ر كه‌سه‌ و به‌ره‌و لایه‌ك هه‌ڵاتین. ئێتر هه‌ر ئار پی چی و تیربار بوو، ده‌باری. دانه‌برێشكه‌ به‌لایه‌وه‌ هیچ نه‌بوو! ڕه‌هێڵه‌باران بوو، به‌ڵام له‌ جێگای باران ئاسن ده‌بار!
ئێتر لێره‌ نادر بریندار ده‌بێ و به‌ ته‌نیا ده‌مێنێته‌وه‌. منیش كه‌وتمه‌ نێو تووڕكه‌ڵانێكی زۆر پیس و دڕكدار، جا دڕكی چی، خۆزگه‌ به‌ گولله‌، گشت گیانم به‌ دڕوو بریندار ببوو. ئێتر كه‌سمان ئاگامان له‌ كه‌سمان نه‌مابوو، ئه‌وانه‌ش كه‌ مابوون گه‌ڕانه‌وه‌ بۆ شوێنی دیاری كراو. كه‌ یه‌كمان گرته‌وه‌ ته‌نیا نادرمان كه‌م بوو. نادریش داوی بریندار بووین له‌ نێو باخێكدا خۆی ده‌شارێته‌وه‌، ڕۆژی دواتر جاشی جوانڕۆیی و پاسدار ده‌كه‌ونه‌ شوێن خوێنه‌كه‌ی و شوێنی هه‌ڵده‌كه‌ن و دیدۆزنه‌وه‌ و شه‌هیدی ده‌كه‌ن. به‌ڵام له‌به‌ر ئه‌وه‌ چاشه‌كان ناسیبوویان نه‌یانهێشتبوو بیبنه‌وه‌ بۆ كامیران و خه‌ڵكیش له‌ گازرخانیدا ناشتبوویان. (ئه‌و كاته‌ بۆ چاوترساندنی خه‌ڵك و بۆ به‌رز كردنه‌وه‌ی وره‌ی نزمی جاش و پاسداره‌كان، ئه‌گه‌ر پێشمه‌رگه‌ شه‌هید ببوایه‌ جه‌نازه‌كه‌یان له‌ شوێن ماشێن و تراكتۆر و مه‌كه‌ینه‌ی دیكه‌ ده‌به‌ست و به‌ نێو شار و دێدا ده‌یانكێشا! ئه‌مه‌ش جۆرێك له‌ وه‌حشی گه‌رییه‌!)
ئێمه‌ش پاش گه‌ڕانێك باش ئه‌حله‌ مسری و هاوڕێكانیمان دۆزیه‌وه‌. جا شێوه‌ی دۆزێنه‌وه‌كه‌شیان زۆر سه‌ری بوو، ئێمه‌ ده‌چووینه‌ هه‌ر دێیه‌ك، دیانوت دوێنه‌ شه‌و لێره‌ بوون، یان پێره‌شه‌و لێره‌ بوون. هه‌ر وه‌ك له‌ پێشدا ئیشاره‌م پێكرد، ئه‌و كاته‌ بێسیم و كه‌ره‌سته‌ی له‌و چه‌شنه‌ش نه‌بوو كه‌ یه‌كتری ئاگادار بكه‌ینه‌وه‌. دوایین جار كه‌ چووینه‌ "كه‌ڵاتێ" وتیان دوێنه‌ شه‌و لێره‌ بوون، ئێتر ئێمه‌ش هه‌ڵكشاین بۆ سه‌ر كێوی زه‌ڕنه‌ و له‌وێشه‌وه‌ به‌ شوێن كه‌وشه‌كانیاندا شوێنیانمان هه‌ڵكرد كه‌ چووبوونه‌وه‌ بۆ لای "ره‌یسان" و "چاڵاوه‌" و ئه‌و كێوانه‌ی ده‌وروبه‌ر، له‌وێ یه‌كترمان دیته‌وه‌. دیاربوو كه‌ وه‌ریان زۆرترسا ببوو، بۆیه‌ له‌و كێوانه‌ی نیزك كه‌ڵاتی و "ته‌ختی زه‌نگی" نه‌مابوونه‌وه‌ و زۆر دوور كه‌وتبوونه‌وه‌.
یه‌ك یه‌كترمان دیته‌وه‌ و بوو به‌ یه‌ك گریان و باوه‌كه‌ڕۆ و بانگ و سه‌ڵا و ده‌ست له‌ مه‌ل یه‌كتر كردن و ماچ و مووچێك، كه‌ بۆ گێڕانه‌وه‌ نابێ. یه‌ك گریان و شیوه‌نێك بوو، هه‌ر نه‌بێته‌وه‌، گریانی شادی چاوی هه‌موومانی پڕ كردبوو له‌ ئاو.