له‌ هاوینی ڕابردووه‌وه‌ تاکوو ئێستا به‌ڕیز و نه‌مر مامۆستا شێخ حه‌سه‌ن ڕستگار و کوڕه‌که‌ی (هاشم ڕه‌ستگار) دوای ده‌مه‌قاڵه‌یه‌ک له‌گه‌ڵ به‌کرێگیراوانی کۆماری ئیسلامی ئێران، له‌سه‌ر کردنه‌وه‌ی مزگه‌وتێکی نوێ له‌ ناوچه‌ی کرماشاندا، بێسه‌روشوێن بوون.
تاکوو رۆژی پێج شه‌ممه‌ی رابردوو (17/11/12005) که‌ ته‌رمی مامۆستا شیخ حه‌سه‌ن و کوڕه‌که‌ی (هاشم ڕه‌ستگار) له حه‌وشی‌ مزگه‌وتی تازاوادای کرماشان ده‌دۆزرێنه‌وه‌.
ئه‌وه‌ی که‌ کۆماری ئیسلامی ئێران به‌رده‌وام به‌ دڕندانه‌ترین شێوه‌ خه‌ڵکی ئه‌شکه‌نجه‌ کردووه و‌ کوشتووه‌ و ڕاوی ناون و ته‌نانه‌تش له‌ ده‌ره‌وه‌ی وڵاتیش تێرۆری کردوون، شتێکی نوێ نییه‌ و کارنامه‌ی ئه‌و رژیمه‌ بۆگه‌نه‌ پڕه‌ له‌م کاره‌ساتانه‌.
ئه‌وه‌ی که‌ مرۆڤ له‌ ڕاده‌به‌رده‌ر له‌م کرده‌وه‌ دڕندانه‌یه‌ سه‌ری سووڕ ده‌مێنێ ئه‌وه‌یه‌ که‌ مامۆستایه‌کی به‌ ته‌مه‌نی وه‌ک شێخ حه‌سه‌ن، که‌ی بۆ ئه‌وه‌ ده‌بێ ئه‌شکه‌نجه‌ و ئازار بدرێ! مامۆستایه‌کی به‌ته‌مه‌ن که‌ له‌ ژیانیدا زه‌ره‌ری ته‌نانه‌ت بۆ مێرووله‌یه‌کیش نه‌بووه‌. که‌ساییه‌تیه‌کی به‌ ته‌مه‌نی وه‌ک مامۆستا شیخ حه‌سه‌ن ته‌مه‌نی خۆی کردبووه‌ و نه‌ده‌بوو کۆماری ئیسلامی ئه‌م جاره‌ش برینی کورده‌کانی ئه‌و ناوچه‌یه‌ بکولێنێته‌وه‌.
کۆماری ئیسلامی ته‌نیا به‌ ئه‌شکه‌نجه‌دانێکی ئاسایی وازی له‌و مامۆستا به‌ ته‌مه‌نه‌ نه‌هێنابووه‌، به‌ڵکوو به‌و په‌ڕی شه‌رمه‌زاییه‌وه‌، ته‌رمه‌که‌ی شێوێندرا بوو، ئه‌سیدی به‌ سه‌روچاودا کرابوو، مل و باڵ و پای شکا بوو! ئه‌شکه‌نجه‌که‌رانی کۆماری ئیسلامی ته‌نیا به‌ ئه‌شکه‌نجه‌ کردنی مامۆستا شێخ حه‌سه‌ن، ڕازی نه‌بووبوون و له‌ ئه‌شکه‌نجه‌دانی کوڕه‌که‌یشیدا له‌ هیچ بێ شه‌رمییه‌ک ده‌ستیان نه‌پاراستبوو.
نه‌زانی ئه‌و ڕژیمه‌ و به‌کرێ گیراوانی له‌وێدا ده‌رده‌که‌وێ که‌ رۆژێک پێش دۆزینه‌وه‌ی ته‌رمه‌کان، چاڵیک به‌خه‌ڵک هه‌ڵده‌که‌نن که‌ گوایه‌ لاشه‌کان له‌وێدان! دوای ئه‌وه‌ هیچ نه‌دۆزرایه‌وه‌، شه‌وی هه‌مان رۆژ چه‌ند که‌س له‌ خۆیان له‌ مزگه‌وه‌ته‌که‌دا ده‌مێننه‌وه‌ و بڵاوه‌ به‌ خه‌ڵکه‌که‌ش ده‌که‌ن. شه‌و به‌ دزیه‌وه‌ لاشه‌کان له‌ چاڵه هه‌ڵکه‌نداراوه‌که‌دا داده‌نێن و رۆژی پێنج شه‌ممه‌ خه‌ڵک ئاگادار ده‌که‌نه‌وه‌ که‌ ئه‌وا جه‌نازه‌کان له‌ نێو چاڵه‌که‌دان!!
دوای ده‌رهێنانی لاشه‌کان له‌ چاڵه‌که‌، خه‌ڵکه‌که‌ به‌ زه‌حمه‌ت ده‌تواننن لاشه‌ی ئه‌شکه‌نجه‌کراو و شێوێندراوی مامۆستا و کوڕه‌که‌ی بناسنه‌وه‌!
به‌کرێگیراوانی کۆماری ئیسلامی به‌مه‌‌ش واز ناهێنن و له‌ ترسی ئه‌وه‌دا که‌ خه‌ڵک خۆپیشاندان نه‌که‌ن، به‌خه‌ڵکه‌که‌ ڕاده‌گه‌ییه‌نن که‌ ئێمه‌ فیلم له‌ ڕیوڕه‌سمی به‌خاکسپاردنه‌که‌ هه‌ڵده‌گرینه‌وه‌ و ده‌بێ ئاگاداری خۆتان بن. به‌م جۆره‌ ته‌رمی مامۆستا و کوڕه‌که‌ی له‌ بێده‌نگییه‌کی ته‌واودا به‌خاک ده‌سپێردرێن.
ئه‌مه‌ یه‌کم جار و دووهه‌م جار و دوایین جاریش نییه‌ که‌ کۆماری ئیسلامی زانایانی ئایینی ناوچه‌ی کرماشان بێ سه‌روشوێن ده‌کا و پاشان به‌ ئه‌شکه‌نجه‌ کراوی و مردوویی، ته‌حویلی بنه‌ماڵه‌کانیان ده‌داته‌وه‌.
پێش مامۆستا شێخ حه‌سه‌ن و کوڕه‌که‌ی، مامۆستا ڕه‌بێعیش به‌و شیوه‌ نامرۆڤانه‌یه‌ له‌ نێو چوو. هه‌ر ئێستاش ده‌یان مامۆستای ئایینی له‌ ناوچه‌ی سه‌رپێڵ و زه‌هاو بێ سه‌روشوێنن و که‌س نازانێ کۆماری ئیسلام له‌ کام ئیشکه‌نجه‌گادا خه‌ریکی ئه‌شکه‌نجه‌ کردنیانه‌،
ئه‌وه‌ش که‌ زۆر روون و ئاشکرایه‌، کۆماری ئیسلامیش ناتوانێ هه‌تا هه‌تایه‌ به‌و شێوه‌یه‌ خه‌ڵک بێ سه‌روشوێن بکا و له‌ ناویان بوا. ئه‌ویش هه‌ر وه‌ک ئه‌وانی پێشوو ده‌بێ ڕۆژێک بچێته‌ ته‌نه‌که‌خۆڵی مێژووه‌وه‌.
له‌گه‌ڵ داخ و که‌سه‌ری زۆر، پڕ به‌ دڵ سه‌ره‌خۆشی له‌ ئه‌و بنه‌ماڵه‌ به‌ڕێزه‌ ده‌که‌م و داوای سه‌بووریشیان بۆ ده‌که‌م و هیوادارم ئه‌مه‌ دوایین خه‌میان بێت.