ئیمشه‌و شه‌وی "یه‌لدایه‌ و درێژترین شه‌وی ساڵه.
له‌ سه‌ر ئه‌م شه‌وه گه‌ڵێک چت وتراوه و زۆر نووسراوه‌ و هه‌ڵبه‌ستیش هۆنراوه‌ته‌وه، به‌تایبه‌تی فارسه‌کان که گرینگێکی زۆر به شه‌وه‌ ده‌ده‌ن، هۆنه‌رانی وه‌ک حافز و سه‌عدی و له‌م دواییانه‌شدا به‌تول وه‌زیری و زۆریتر هه‌ڵبه‌ستیان بۆ شه‌وی یه‌لدا هۆنیوه‌‌ته‌وه.
ئه‌گه‌ر چاوێک به مێژوودا بخشێنین بۆمان ده‌رده‌که‌وێ که‌ له‌ ڕۆژگاری کۆندا ئه‌م ڕۆژه‌یان گرێ داوه‌ به ئه‌فسانه‌ و چیرۆکی نه‌گونجاوه‌وه. دواتریش له‌ ئایینی زه‌ردوشتدا، یه‌لدا (له‌ دایکبوون، زاو) یه‌لدایان گرێ داوه به ڕۆژی له‌دایکبوونی "ایزد مهر" یان هه‌مان هه‌تاو، خۆر یان میترا. واته‌ یه‌لدا ناوی پێغه‌مبه‌رێکه که‌ 271 ساڵ پێش له‌ زایین له‌ دایک بووه.
به‌ڵام ئه‌وه‌ی له هه‌مووی ڕاستتره ئه‌وه‌یه که وشه‌ی "یه‌لدا" سریانی یه‌ و مانای "له‌دایکبوون" ده‌دا.
ئه‌وانه‌ش که باوه‌ڕیان به ئایینی زه‌ردشتی هه‌یه، گرینگێکی زۆر به‌م ڕۆژه ده‌ده‌ن و له‌به‌ر ئه‌وه ئه‌م ڕۆژه گرێ ده‌ده‌ن به خۆر و گڕوتین و ڕه‌نگی سووره‌وه، ئه‌م شه‌وه‌ دوو میوه‌ که پێوه‌نیدیان به‌م ڕه‌نگه‌وه هه‌یه، ده‌بنه ڕازێنه‌ره‌وه‌ی سفره‌کانیان. ئه‌م دوو میوه‌یه‌ش "هه‌نار" و "هه‌نی" (شووتی)ن.
هه‌روه‌ک ده‌زانین هه‌نار پڕه له دانه‌ی ره‌نگ سوور و هه‌روه‌هایش شووتی نێوه‌که‌ی سووره، جا بۆیه له‌م شه‌وه‌دا ئه‌م دوو میوه‌ زۆر ده‌خورێن.
دواتریش "یه‌لد" له هۆنراوه‌ی هۆنه‌رانی کورددا ڕه‌نگی داوه‌ته‌وه، بۆ وێنه حه‌زره‌تی "نالی" یه‌کێک له هه‌لبه‌سته‌کانی خۆی به‌م جۆره ده‌ست پێ ده‌کا:
شه‌وی یه‌لدایه‌ یا ده‌یجووره‌ ئه‌مشه‌و
که‌ دیده‌م دوور له‌ تۆ بێ‌نووره‌ ئه‌مشه‌و؟!
ئه‌مه کورته‌یه‌ک بوو له‌ شه‌وی یه‌لد، به‌ڵام له هه‌مان شه‌و‌دا که‌سێکی دیکه له دایکبووه که بۆ من هه‌مان ڕۆڵی هه‌بووه که ئه‌وانی دیکه هه‌یانبووه و لای من له هه‌مووان خۆشه‌ویستتر بووه، ئه‌ویش شه‌هیدی زینده‌یاد دوکتور قاسملوویه‌.
هاوڕێی به‌ڕێزم کاک قادر وریا له پێشه‌کی کتێبه‌که‌ی خۆیدا ئاوای نووسیوه‌: "من له‌ درێژترین شه‌وی‌ ساڵ‌، له‌ شه‌و زستانی‌ 1309دا له‌دایك بووم". له‌و كاته‌وه‌ كه‌ دوكتور قاسملووی‌ نه‌مر ئه‌م ڕسته‌یه‌ی‌ له‌ كاتی‌ خۆناساندن و خۆكاندیداكردن بۆ ئه‌ندامه‌تیی‌ كۆمیته‌ی‌ ناوه‌ندیی‌ حیزب له‌ كۆنگره‌ی‌ شه‌شه‌مدا، له‌ پشت تریبوونه‌وه‌ به‌ده‌مدا هات...
که‌وابوو ئه‌و مرۆڤه هه‌ڵکه‌وتووی گه‌له‌که‌مان له‌م شه‌وه‌دا له دایکبووه و هه‌موو ساڵیک ئه‌وینداران و درێژه‌ده‌ری ڕێگایه‌که‌ی و به‌تایبه‌تی هاوسه‌نگه‌رانی له‌م شه‌وه‌دا شه‌وزینده‌داری ده‌کێشن و ده‌خۆن و ده‌خۆنه‌وه و که‌یف و شادی ده‌گێڕن. ئێستاش که کاتژمێر له 5ی سه‌رله‌به‌یانی نزیکه ده‌بێته‌وه من و چه‌ند هاوڕێم هێشتا نه‌خه‌وتین و پێکه‌وه دانیشتووین و قسه‌ی خۆش ده‌که‌ین.
لێره‌دا که ناوی زینده‌یاد دوکتور قاسملوو هات، پێم خۆشه به‌سه‌رهاتێکی کورد له‌سه‌ر خاکی بوون و خۆ به گه‌ره‌نه‌زانینی ئه‌و بگێڕمه‌وه. ئه‌م گێڕانه‌وه‌ش دوو سوودی هه‌یه، یه‌که‌م ئه‌وه‌یه که وه‌ک مێژوو ده‌مێنێته‌وه‌ و دووه‌میش خه‌ڵکانێک له هێندێک خۆو ئاگاری ئه‌و مرۆڤه ئاگادار ده‌بن:
کاتێک له ئاسایشگاه له‌ گه‌ڕه‌دێدا ده‌ژیاین، دوکتور قاسملوو بۆ سه‌ردان هات بۆ لامان. هه‌موومان له‌ سالونی نانخواردندا دانیشتین و کاک سه‌ید ڕه‌سوڵ بابی‌گه‌وره‌ که به‌رپرسی ئاسایشگا بوو و له کۆنه‌وه کاک دوکتۆری ده‌ناسی، ده‌ستی به قسه‌ کرد و پاشان پێشمه‌رگه‌یه‌کی به‌ته‌مه‌ن به‌ڵام موحته‌ره‌م و ڕێزدار به ناوی کاک عومه‌ر بابامیری ئیجازه‌ی گرت هه‌ڵبه‌ستێک بخوێنێته‌وه.
کاک عومه‌ر ده‌ستی پێکرد: ئه‌م هه‌ڵبه‌سته به زۆر سه‌رکرده‌، سه‌رۆک عه‌شیره‌ی وه‌ک سمایل ئاغای سمکۆ و ... وتراوه‌‌ته‌وه و ئیستاش که جه‌نابت (ڕووی له کاک د. قسملوو بوو ) ته‌شریفت هێناوه، من پێم خۆشه‌ بۆ جه‌نابتی بخوێنه‌مه‌وه.
ـ لێره‌دا کاک دوکتور به‌ر پێ گرت و وتی کاکه گیان من نه‌ سه‌رۆک عه‌شیره‌تم و نه‌ک سه‌رۆکی که‌سێکیشم، منیش وه‌ک تۆ پێشمه‌رگه‌یه‌کی ئه‌و حیزبه‌م، تکایه‌ ئه‌و هه‌ڵبه‌سته نه‌خوێنه‌وه.
کاک عومه‌ر که ئینسانێکی موحته‌رم بوو و له بنه‌ماڵه‌یه‌کی موحته‌ره‌مدا گه‌وره ببوو، زۆری پێ ناخۆش بوو، ئێمه هه‌ستمان ده‌کرد که له شه‌رمدا ره‌نگی به‌ره‌و سووری ده‌چوو.
کاک سه‌ید ره‌سوڵیش هه‌ستی کرد که کاک عومه‌ر دڵی ناسکه و له به‌ر ئه‌وه له دڵی گران نه‌یه، داوای له کاک دوکتور کرد، ئیجازه بدا که کاک عومه‌ر چه‌ند به‌یت له هه‌وه‌ڵی هه‌ڵبه‌سته‌که‌ی بخوێنێته‌وه بزانین چۆنه و باسی چی ده‌کا.
کاک دوکتور وتی هه‌ڵبه‌ستێک که به سه‌رۆک عه‌شایر و گه‌وره پیاواندا وتراوه، بۆ ئینسانی شۆڕشگێر نه‌هاتووه، به‌ڵام ئێستا که جه‌نابت (ڕووی قسه‌کانی له کاک سه‌ید ڕه‌سوڵ بوو) پێتخۆشه‌ با بیخوێنێته‌وه.
کاک عومه‌ر که‌ به پێچه‌وانه‌ی ئێمه که دانیشتبووین و زۆر "خودمانی" پاڵمان دابووه‌وه، هه‌ستابووه سه‌رپێ و دیسان ده‌ستی پێ کرده‌وه:
هه‌ی گه‌وره‌ی گه‌وران سه‌رۆکی ...
ـ ئیتر کاک دوکتور لێره‌دا هه‌ڵبه‌ست خوێندنه‌وه‌که‌ی پێی پساند و وتی فه‌رموو دانیشه‌. تکایشت لێ ده‌كه‌م که جارێکیتر له کۆبوونه‌ی کادر و پێشمه‌رگه‌ و ئه‌ندامانی حیزبیدا ئه‌م جۆره هه‌ڵبه‌ستانه نه‌خوێنه‌وه. کاکی خۆم ئێمه پێشمه‌رگه‌ین و هیچمان له یه‌کتری زیاتر نیه...

کاک دوکتور گرینگیه‌کی زۆری به رۆژنامه و کاری ڕۆژنامه‌گه‌ری و ڕاگه‌یه‌نه‌ره گشتیه‌کان به گشتی ده‌دا و له هه‌موو ده‌رفه‌تێک که‌ڵکی وه‌رده‌گرت بۆ ئه‌وه‌ی ده‌نگی گه‌له‌که‌ی به خه‌ڵکانی تر بناسێنێ.

کاتێک له هاته‌ سوید بۆ لامان له "فۆلکت هویس"ی "سوێدرمالم"ی شاری ستوکهۆلمدا یه‌کترمان بینی. من و کاکه حه‌ممه‌ی مه‌جیدزاده‌ (گامێشکۆلی) هاوڕێم و ئازاد مامالی یه‌کێک کامیرایه‌کی وێنه‌گری باشمان پێ بوو که زۆر له کامیرای وێنه‌گره‌کانی ڕۆژنامه‌نووسان ده‌چوون. له کاتی پشوودا کاک دوکتور چووبووه‌ ده‌ره‌وه و له گه‌ڕانه‌وه‌یدا ئێمه له سه‌ر پله‌کان راوه‌ستابووین. که‌ نزیکمان بووه‌وه کاکه‌ حه‌ممه‌ ده‌ستی بۆ لای من ڕاکێشاو و به گاڵته به کاک دوکتور وت ئه‌وه ڕۆژنامه‌نووسه. کاک دوکتوریش پێی وابوو کاکه‌ حه‌ممه راست ده‌کا و هه‌ر بۆیه هات بۆ لای من، منیش له‌و هه‌له که‌ڵکم وه‌رگرت و تا گه‌یشته لام چه‌ند وێنه‌م لێ گرت. هاته پێش تۆزێک پێکه‌نی و زانی که ئێمه‌ین و پێکه‌وه به ئاسانسوره‌که چووینه سه‌ره‌وه و کۆبوونه‌وه.
ئه‌و کاته من لاو بووم و ئه‌هلی هیپ‌هۆپ و ئه‌م به‌زمانه بووم و قژێکی شۆڕم هه‌بوو و تیشورتی به نووسراوه‌م زۆر له به‌ر ده‌کرد. که له ئاسانسوره‌كه چووینه ده‌ره‌وه، وتی کامه بزانم ئه‌وه چیت له سه‌ر سینگ نووسراوه. له‌و کاته‌دا نووسراوه‌که‌ی سه‌ر سینگی ده‌خوێندمه‌وه یه‌کێک له هاوڕێیانی به‌شدار وێنه‌یه‌کی لێ گرتین، که سه‌رمانی په‌ڕاندووه. به‌داخه‌وه دوو ڕۆژ دوای ئه‌م به‌سه‌رهاته شه‌هید کرا.

کاتێکیش چه‌ریک فه‌داییه‌کان له نێوخۆیاندا کردیانه شه‌ڕ و به‌داخه‌وه کاک که‌یکاوس (عه‌بباس) ی ئامۆزای من له نزیک بنکه‌ی ڕادیۆکه‌یان له گاپیلۆن شه‌هید بوو. له ماڵی کاک ئه‌بوبه‌کره‌وه ته‌ڵه‌فوونی بۆ ماڵ من له لینده‌سبێری کرد و له پێشدا له‌گه‌ڵ کاک حوسێن قسه‌ی کرد و داییش له‌گه‌ڵ من قسه‌ی کرد زۆر زۆر ناڕه‌حه‌ت بوو بۆ کاک که‌یکاوس، ده‌یوت یه‌کێک له‌و کوڕه‌ باشانه‌ بووه که ناسیویه‌تی، یه‌کجار زۆری پێ ناخۆش بوو که شه‌هید بووه.
له‌بیرمه هه‌ر له‌م قسه‌کردنه‌دا کاک حوسێن له لایه‌ن هه‌ردووکمانه‌وه داوای وێنه‌ی لێکرد که بۆمان بنێرێ. له وڵامدا وتی وێنه‌ی منتان بۆ چیه! خه‌ڵکی وێنه‌ی چتێکی جوان له گیرفان ده‌نێ خۆ من جوانیش نیم.
ئه‌مه‌ش یه‌کێک له کرده‌وه‌کانیتری بوو که ده‌یتوانی له‌گه‌ڵ هه‌موو که‌سێک ببێته هاوده‌م و قسه‌ی خۆشی له‌گه‌ڵ بکا. یه‌کێک له‌و که‌سانه‌ی که زۆری خۆش ده‌ویست هونه‌رمه‌ند شوانپه‌روه‌ر بوو. جارێک شوان په‌روه‌ر گێڕایه‌وه که:
هه‌موو جارێک که له‌گه‌ڵ دوکتور یه‌کترمان ده‌بینی، دیوت: شڤا که‌رما خۆ خه‌زال خه‌زالێکی بۆ من بێژه. جا یه‌کێک له‌و گۆرانیانه‌ی شوان په‌روه‌ر که کاک دوکتۆر زۆری حه‌ز لێ کردبوو "خه‌زاڵ خه‌زاڵ" ببوو.
ئه‌وا شه‌وی یله‌دا ته‌واو بوو و رۆژ ده‌ستی پێکرد، ڕۆژه‌کانیش له‌ ئه‌مڕۆوه به‌ره‌ به‌ره دێژتر و کوتتر ده‌بنه‌وه. دیاره ئه‌م گۆڕانکاریه‌ی سروشتیش نیو کوره‌ی جنوبی ناگرێته‌وه و بۆ ئاگاداری میوانه به‌ڕیزه‌کانیش له ئوسترالیادا ئه‌م شه‌وه درێژه‌ی له نێو ساڵدا نیه.

یادی ئه‌م شه‌هیده نه‌مره پیرۆز بێ و شه‌وی یه‌لداش له هه‌موو میوانانی ئه‌م بڵاگه پیرۆز بێ.