دوێکه بیست ساڵ به سه‌ر کوشتنی ئولوف پالمه‌ سه‌رۆک وه‌زیرانی ئه‌و کاتی سوید دا تێپه‌ڕی. پێم وابێ من یه‌کێک له‌و که‌سانه‌م که ئه‌و رووداوه‌م زۆر باش له‌ بیره‌ و هه‌رگیزیش له‌ بیرم ناچێ. هۆیه‌که‌شی ئه‌وه بوو که تازه‌ سه‌رم له‌ کۆمه‌ڵگایه‌کی نوێوه ده‌رچووبوو که هه‌موو شتێکی بۆ من وه‌ک خه‌ون وابوو. هیچێکی وه‌ک ئه‌و شوێنه نه‌بوو که من لێ هاتبووم. هه‌مان رۆژیش وێنه‌ی من و ئولوف پالمه له سه‌ر لاپه‌ڕه‌ی یه‌که‌می رۆژنامه‌ی شاره‌که‌مانه‌وه چاپ کرابوو، وێنه‌ی ئه‌و تۆزێک له‌سه‌ره‌وه‌ی وێنه‌که‌ی منه‌وه له به‌ر ئه‌وه کوژرابوو. وێنه‌ی منیش له‌به‌ر ئه‌و گرفتانه‌ی که ئه‌و کات له نه‌خۆشخانه بۆم پێش هاتبوو.
ئێمه به‌یانیه‌که‌ی واته ئیمڕۆ هه‌واڵه‌که‌مان بیست. هه‌موو رادیۆ و ته‌له‌فزیۆنه‌کان باسیان ده‌کرد. ئه‌وه‌ی له‌و کاته‌دا بۆ من زۆر زۆر جێگای سه‌رنج و باوه‌ڕ نه‌کردنی بوو، ئه‌وه‌ بوو که خه‌ڵکه‌که وه‌ک لای ئێمه بۆ سه‌رۆکه‌که‌یان شیوه‌ن و ڕۆ ڕۆیان نه‌بوو و ئه‌و ڕۆژه‌یشیان به رۆژی پشوو ڕانه‌گه‌یاند. ته‌نیا کارێک که ده‌وڵه‌ت کردی ئه‌وه‌ بوو که‌ ئه‌و شه‌قامه‌ ئولوف پالمه‌ی تێدا کوژرا، پێشتر ناوی شه‌قامی تونێل (تونێل گاتان) بوو و دوای ئه‌و رووداوه‌، له‌و شوێنه‌ ئه‌وی لێ کوژرا به‌ره‌و خوار تاکوو "ڤاسا گاتان" (شه‌قامی ڤاسا) ناو نرا "ئولوف پالمه گاتان" (شه‌قامی ئولوف پالمه).
به‌سه‌ر هاتی کوشتنه‌که‌ش به‌م شێوه‌یه بوو:
ئولوف پالمه‌ و هاوسه‌ره‌که‌ی "لیسپت" پێکه‌وه چووبوون بۆ سینمایه‌ک له‌ شه‌قامی ناوبراودا و چاویان له فیلمی "برایانی موزارد" کردبوو. له کاتی هاتنه‌وه‌یان بۆ ماڵ، کابرایه‌ک له‌ نزیکه‌وه گولله‌یه‌ک له سه‌ری ده‌دا و هه‌ڵدێ. به‌و جۆره‌ که‌ ده‌یانگێڕایه‌وه ته‌نیا یه‌ک که‌س دیبووی و ئه‌ویش هاوسه‌ره‌که‌ی ئولوف پالمه بوو.
دوای ماوه‌یه‌ک کابرایه‌کی ئه‌لکولیست و موعتاد به‌ ناوی (کریستر په‌ترشۆن) گیرا و وتیان ئه‌وه ئه‌و کوشتوویه. دایی سه‌پاندیان به مل کورددا و به‌رپرسی گشتی پۆلیسی ئه‌و کات "هانس هۆلمه‌ر" ده‌یوت ئێمه له‌ سه‌ددا 95 دڵنیاین که پ. ک.ک. ئه‌و کاره‌ی کردووه. ده‌وڵه‌تی ئه‌و کاتی تورکیه‌ش وێنه‌ی دوو، سێ ئه‌ندامی پ.ک.ک ی بڵاو کردبووه‌وه و دابووی به پۆلیسی سوید که گوایه‌ ئه‌وه‌ ئه‌وان کوشتوویانه! پ.ک.ک.ش له‌ حاست ئه‌م کرده‌وه‌ بێ ده‌نگی ده‌کرد و هیچی نه‌ده‌گوت، هه‌رچه‌نده هێندێک ئه‌ندامی له سوید به‌ڕاستی ژیانیان لێ هه‌ڵگیرابوو و پۆلیس به وه‌خت و ناوه‌ختدا خۆی ده‌کرد به ماڵیاندا.
دوای ماوه‌یه‌ک کریستر په‌ترشۆن به‌ردرا و پووڵیکی زۆریشیان پێدا که گوایه‌ بێ گوناح له زیندان به‌ند کراوه!
به‌ڵام پێش ئه‌وه راستی به‌سه‌رهاته‌که بگێڕمه‌وه‌، یه‌ک دوو خاڵی زۆر گرینگ هه‌یه که ده‌بێ ئیشاره‌ی پێ بکه‌م. یه‌که‌میان ئه‌وه بوو که ئولوف پالمه هه‌میشه‌ ئوسکۆرتی تایبه‌تی هه‌بوو، به‌ڵام ئه‌و شه‌وه‌ که‌سیان له‌گه‌ڵی نه‌هاتبوون، دووهه‌میش ئه‌وه بوو که کابرایه‌کی فرۆشیاری مه‌وادی بێهۆشکه‌ر که‌ ماڵه‌که‌ی له‌و به‌ر شه‌قامه‌یه‌که‌وه‌یه‌ و به مه‌ودای چه‌ند سه‌د میترێک له شه‌قامێکی دیکه‌دا ده‌ژیا، ته‌له‌فوونه‌که‌ی له کونترۆڵی پۆلیسدا بووه و هه‌موو قسه‌کانی تۆمار کراوه، ئه‌و ده‌وروبه‌ره‌ش به هۆی پۆلیسه‌وه‌ ته‌ندرابووه‌، به‌ڵام ماوه‌یه‌کی کورت پێش ئه‌وه ئولوف پالمه بکوژرێ، بڕیاریان پێداربوو که ئه‌و ناوچه‌یه‌ به جێ بێڵن و بڕۆنه‌وه!
سێهه‌میش ئه‌وه‌یه‌ که‌ دوای کوژرانی ئولوف پالمه گرووپێکی تیابه‌تیان به ناوی "ئولوف پالمه گرووپن" پێک هێنا که لێکۆڵینه‌وه‌ له سه‌ر ئه‌و رووداوه بکا و به‌ دوای ئه‌و گرێکۆنه‌دا بچێ و ئه‌گه‌ر توانی ئه‌وا بیکاته‌وه‌، به‌ڵام ئه‌م گرووپه تاکوو دێنێ نزیک میلیاردێک خه‌رجی بووه و هێشتاش به هیچکوێ نه‌گه‌یشتووه! دوای به‌دوادا چوونی کوژرانی ج. ئف که‌نه‌دی، ئه‌مه‌ گرووپه‌ی ئولوف پالمه گه‌وره‌ترین خه‌رجی هه‌ڵگرتووه و له مێژوودا بووه به دووهه‌م!
چواره‌، له رۆژێ هه‌وه‌ڵه‌وه هاوسه‌ره‌که‌ی ئولوف پالمه (لیسپت پالمه) کریستر په‌ترشۆنی به قاتڵی مێرده‌که‌ی ناسییه‌وه و بۆ پۆلیسی ده‌ستنیشان کرد، به‌ڵام باوه‌ڕیان پێ نه‌کرد، تازه‌ شکیان بۆ ئه‌وه ده‌چوو که کاره‌‌که له ژێر سه‌ری ئه‌ودا بوو. جارێک وتیان ئافریقایی، جارێک ئامریکایی، جارێک ئامریکا فیلمێکی له سه‌ر کوشتنه‌که‌ ساز کرد و وتی ئه‌وه کاری ک. گ. ب. بووه، جارێک پ. ک.ک. و جارێک ...
سێ ڕۆژ له‌مه‌و پێش فیلمێکی دوکۆمه‌نته‌ر له کانێڵی دووی ته‌له‌فزیۆنی سوید بڵاو کرایه‌وه و کابرایه‌ک که له سه‌ر ته‌ختی نه‌خۆشخانه که‌وتووه و ماوه‌یه‌کی دیکه ده‌مرێ، هێندێک ڕاستی درکان و هه‌موو داستانه‌که‌ی به جۆرێکی دیکه گێڕایه‌وه که گوایه ئاوا بووه:
یه‌کێک له پۆلیسه‌کان پێوه‌ندی به کابرایه‌که‌وه هه‌بووه که له سویددا مه‌وادی گێژکه‌ر ده‌فرۆشێ، ئه‌ویش پووڵی که‌وتووه‌ته سه‌ر ئه‌و کابرایه که ته‌له‌فوونه‌که‌ی له کونترۆڵی پۆلیس دا ده‌بێ. کابرای قه‌رزار پووڵ ناداته‌وه و فرۆشیاریش بڕیار ده‌دا بیکوژێ. بۆ ئه‌م مه‌به‌سته کریستر په‌ترشۆن دیاری ده‌کرێ و ده‌بانچه‌یه‌ک و 5 هه‌زار کرۆنی پێ ده‌درێ. کاتێک کریستر په‌ترشۆن ده‌چێ بۆ به‌ر سینماکه‌ زۆر سه‌رخۆشه‌ و هێنده‌ی کێشاوه‌ ده‌مووچاوی سوور هه‌ڵگه‌ڕاوه‌ و ئاگای له خۆیشی نابێ. کابرایه‌ک ده‌بینێ که له پشته‌وه‌ شکڵ و شه‌مایلی وه‌ک "سێدرگرێن" (کابرای قه‌رزار) ده‌چێ، راست ده‌بانچه‌ ده‌رتێرێ و گوله‌یه‌ک له سه‌ری ده‌دا و هه‌ڵدێ. ئه‌مه کولی به‌سه‌رهاته‌که‌ بوو. ئێستا زانرا که دوای بیست ساڵ دوای ئه‌وه که ئه‌و که‌سانه له کاره‌که‌دا گرینگیان هه‌بوو، یه‌کیان له ئامریکا و ئه‌کیان به نه‌خۆشی ئه‌یدز و یه‌کیان به هۆیه‌کی سه‌یر و سه‌مه‌ره‌وه (کریستر په‌ترشۆن شه‌وێک له به‌ر نه‌خۆشخانه‌ی سانت یۆراندا ده‌که‌وێ و سه‌ری له ئاسنێک ده‌دا و داوی چه‌ند رۆژ مرد).
ماوه‌یه‌ک پێش ئه‌وه کریستر په‌ترشۆن بمرێ داوای کردبوو که ده‌یهه‌وێ کوڕه‌که‌ێ ئولوف پالمه ببینێ، ئیتر ویستوویه چی پێ بڵێ، که‌س نازانێ. به‌ڵام له لای هاوڕێکانیه‌وه باسی کردووه که ئه‌و ئولوف پالمه‌ی کوشتووه‌. دوای ئه‌وه‌ش که ده‌بانچه‌که‌یان به شێوه‌یه‌کی زۆر سه‌یر له ئاوی ده‌ریاکانی شاری ستۆکهۆڵمدا دۆزیه‌وه‌ و له‌گه‌ڵ ئه‌و گوله‌یه که ئولوف پالمه‌ی پێ کوژرابوو، تاقی کرایه‌وه‌، زانرا که ئه‌و گوله به‌و ده‌بانچه تۆپلییه‌ ته‌قاوه که ماوه‌ی چه‌ند مانگ پێش کوشتنی ئولوف پالمه، سێدرگرێن به کریستر په‌ترشۆنی فرۆشتووه!
له‌ ڕاستی دا و له به‌ختی شه‌ڕی ئولوف پالمه‌، له جێگای ئه‌وه کابرای قه‌رزار و گه‌رتی، سه‌رۆک وه‌زیرانی سوید کوژراو و له‌و کاته‌وه هه‌تاکوو ئێستا، له‌به‌ر ئه‌وه ناڕاسته‌وخۆ پۆلیس خۆی ده‌ستی له‌و کاره‌دا بووه، ئه‌م گرێکێره‌یه به نه‌کراوی مابووه‌وه! ئه‌و پۆلیسه که پێوه‌ندی له‌گه‌ڵ سه‌رۆکی فرۆشیاری مه‌واده‌گیژکه‌ره‌کان بووه، له‌به‌ر ئه‌وه کابرا به ئاره‌زووی خۆی بگا و سێدرگرێن بکوژێ، بڕیاری دابوو که پۆلیسه‌کان ماوه‌یه‌ک کورت پێش کوشتنه‌که ئه‌و ناوچه‌یه‌ به جێ بێڵن. پاشانیش که زانیان کار له کار ترازاوه‌ و له جێگای سێدرگرێن، سه‌رۆک وه‌زیرانێکی لێهاتوو و ناودار تێداچووه، کێشه‌که‌یان به‌مبار و به‌وباردا ده‌برد و شوێنه ونکه‌یان پێ ده‌کرد.
ده‌بێ ئه‌وه‌ش بڵێم که خه‌ڵاتێکی 50 میلیۆن کرۆن(7 کرۆن و شتێک دولارێکه)ی چاوه‌ڕێی ئه‌و که‌سه ده‌کا که ببێته هۆی کردنه‌وه‌ی ئه‌م گرێ پووچکه‌یه.
چه‌ند ساڵ دواتر که خه‌ڵاتی ئولوف پالمه دابه‌ش ده‌کرا و درا به رۆژنامه‌نووس و موفه‌سیری کورد "کوردۆ باکسی" منیش به‌شداری ئه‌و رێوڕه‌سمه بووم و بێجگه‌ له هه‌ڵگرتنه‌وه‌ی وێنه و تۆمار کردنی ده‌نگ له‌گه‌ڵ چه‌ند که‌س له‌وانه کۆردۆ و نایلی باکسی خۆشکی و لیسبت پالمه‌ قسه‌م کرد، به‌ڵام لیسبت له‌سه‌ر رووداوه‌که هیچی نه‌ده‌وت و ته‌نیا ئه‌وه‌نده نه‌بێ که ئه‌وان دڵنیان که کورد ئه‌و کاره‌ی نه‌کردووه و که‌سانی دیکه ئه‌و کاره‌یان کردووه.
له کۆتاییشدا ده‌بێ ئه‌وه بڵێم که ئولوف پالمه که‌سایه‌تییه‌کی ناسراوی سوید و جیهان بوو، هه‌ر له شه‌ڕی ڤیه‌تنامه‌وه بگره تاکوو ئافریقا و شه‌ڕی ئێران و عێراق، هه‌میشه‌ لایه‌نگری ئاشتی بوو و له خۆپیشاندانه‌کاندا له ریزی هه‌وه‌ڵه‌وه بوو. دۆستی کوریش بوو و له‌گه‌ڵ که‌سایه‌تییه‌کی وه‌ک دوکتور قاسملوی نه‌مریشدا دۆست ‌بوو. له وتووێژ و له وتار خوێندنه‌وه‌دا زۆر زۆر نابغه‌ بوو و ناوبانگی جیهانی هه‌بوو، بێژه‌رێکی زۆر بلیمه‌ت و زانایه‌کی گه‌وره‌ی سیاسی بوو.
بۆ ئاشتی شه‌ڕی ماڵوێرانکه‌ری هه‌شت ساڵه‌ی نێوان ئێران و عێراق یه‌ک دوو جار سه‌ردانی ئێرانی کرد و له‌گه‌ڵ خومه‌ینی و به‌رپرسانی کۆماری ئیسلامی ئێراندا دانیشت، به‌ڵام هه‌تاکوو جامی ژاریان پێ نه‌خوارده‌وه، به‌ته‌مابوو له ڕێگای عێراقه‌وه ئیسرایلیش داگیر بکا!